Un fayo riba un “hoogspanning kabel” di N.V. Elmar dialuna anochi a causa cu na un dado momento coriente a bay den varios bario di nos isla. Specialmente den e districto di Paradera a nota efecto pero den districto di Oranjestad tambe tabatin algun bario cu a keda den scur. Un di nan tabata Dr. Henriquezstraat, patras di e edificio di Departamento di Salud Publico, unda tin e vacunanan warda den freezer.
Nos a compronde cu coriente a bay djis un rato y mesora e sistema di generator di coriente a activa pa asina garantisa cu e freezernan ta sigui haya coriente pa por mantene e vacunanan na un temperatura aceptabel. E generator ta funciona di tal forma cu asina coriente bay, mesora e ta cende automaticamente y ta cuminsa manda coriente pa e edificio ey. No ta henter e sistema ta conecta riba e generator, pero e freezernan specifico di e vacunanan si.
Manera ta conoci, dia 13 di januari e freezernan special pa mantene e vacunanan friu a yega Aruba. Expertonan Hulandes a yega algun dia despues pa controla y supervisa si e freezernan ta bon y si e plan di Aruba con pa atende cu e vacunanan, con pa distribui nan y con pa almacena nan, ta corecto. Asina cu a aproba e plan, mesora a duna luz berde pa e vacunanan por bin Aruba.
Asina dia 16 di februari e prome batch di vacuna a yega Aruba. E dia ey a transporta e carga cu maximo siguridad di polis pa e edificio di DVG den Dr. Henriquezstraat, unda ta warda e vacunanan y mantene nan den freezer. Ora cu e prome batch a caba, e di dos cargamento a yega dia 9 di maart 2021. Y no a dura mucho cu e di dos cargamento tambe a caba y mesora su tras, awe dia 23 di maart 2021, e di tres batch a yega nos isla. Ta trata aki di un cargamento di no menos di 17.550 vacuna cu ta dedica awo na e mayornan adulto di riba 60 aña di edad y e resto ta pa tur otro ciudadano di risico entre 18 pa 59 aña di edad.
