Dialogo ta algo cu Minister Chris Romero semper a para p’e. Pa loke tabata e discusion di e ahustacion di tarifa di taxi, e titular di e cartera di Transporte semper tabata atento na e deseonan y necesidadnan di e taxistanan na Aruba.
Esaki ta un grupo cu ta den desventaha den hopi aspecto y como tal Gobierno mester ta comprometi den duna nan mas siguransa den nan trabou. Minister Romero ta consciente di e importancia cu nos taxistanan tin pa nos comunidad. Taxistanan ta un parti importante den nos economia pasobra hopi biaha nan ta e promenan pa atende cu e turistanan cu yega nos isla.
Durante un dialogo, unda cu respet y comunicacion a hunga un rol principal, a logra yega na un concesus pa cu e ahustacion di e tarifanan cu e taxistanan lo bay cobra di awor pa dilanti. Mester remarca cu e ahustacion di tarifa a bay segun e ruta cu ta core. Esaki ta nifica cu tin algun ruta a conoce un aumento mas halto cu otronan. E tarifa nobo lo drenta na vigor e fin di siman aki mes. E 8% of 20% di aumento cu tabata papia di dje, nunca tabata motibo di dificultad pa Gobierno.
A yega na un tarifa di servicio di taxi cu ta satisfactorio pa ambos partido. E taxistanan tabatin nan deseonan, como logicamente tambe ta e caso di parti di Gobierno. Poniendo hunto tur conseho di instancianan y personanan concerni, a logra yega na un un resultado positivo y cu tur hende por biba cun’e. E tarifanan cu a keda acorda awor ta bin como un alivio tanto pa e taxistanan y Gobierno, pasobra awor tur esnan concerni lo bay cana riba e mesun liña.
