Den e dianan aki minister Chris Romero tin un serie di reunion andando encuento Fast Ferry. E ta splica con leu e ta y con hopi mas lo keda pusha. A presenta cierto cifranan por ehempel di 800 pasahero, etc.
E ta conta cu e ta bezig caba di basta tempo. Trabaonan duro ta wordo haci unda cu su team ta bay riba Fast Ferry. Diadomingo ultimo a trece sr. Jansen for di Hulanda y asina reuni cu e diferente instancianan concerni, e stakeholdernan na Aruba. Entre otro Douane, Imigracion, Refineria di Aruba. Tin Citgo hasta a reuni cu nan. ATIA, etc., caminda cu a bay combersa cu nan, wak unda nan ta para pa loke ta esaki. Tur di nan ta excited pa un proyecto asina aki. Sigur e lo beneficia pueblo di Aruba, pero muy en particular p’ariba di brug. A reuni cu e diferente instancianan, nan preocupacionnan a bin dilanti. Tambe a trece e informacionnan aki dilanti den Parlamento. A presenta e concusion cu tabata tin den full e siman na Ministerraad. E proyecto aki for di 2016, un rapport a wordo traha. Tur e datonan tey, e preocupacionnan, y e siguiente paso awo. A trece algo dilanti, pero tin cu wak con ta continua awo. Segun e minister pa Juli/Augustus, e idea ta pa purba yega na un MOU pa firma entre Aruba y Corsou.
Pakico Aruba y Corsou
Tin cu wak ainda si ta entre minister di transporte di Aruba y esun encarga na Corsou. Por ta cu minister presidente tambe. Tin cu wak con ta formula e MOU tambe. Kier haci’e mas pronto posibel. Una bes cu tin esey, e siguiente paso cu tin awor ta cu entre awor aki y aki seis luna, kier yega na un acuerdo entre Aruba, Corsou y e posibel operador. Asina ey, una bes cu yega na esey, por cuminsa wak ki dia ta bay cuminsa cu cierto plannan. E siguiente paso ta, pa yega naun MOU cu Corsou y pa fin di aña purba di yega na un acuerdo conhunto y asina ey hunto cu e operador pa wak e publieke rangvoorwaardennan, pa nan ta cuadra entre Aruba y Corsou y e operador pa asina por haci e proyecto aki un realidad.
Proyecto
Minister Chris Romero a sigui splica cu nos tur sa cu e finansas di gobierno no ta mucho cos di gaba. Corsou a bisa bon cla cu e kier pa e ta un proyecto priva. Esey ta un di nan exigencia sigur sigur. Cu otro palabra, claro Aruba y Corsou mester percura pa tin inversionnan minimo, kiermen di bo mester tin bo rangvoorwaardennan cla, pa e por opera, pero e gasto mes pa traha e pier, bin cu e boto, ta cay bao di un compania priva. Na e manera aki, por medio di concesie por wak con ta yega na dje. E ta bay ta un inversion minimo cu ta wordo cubri entre Aruba y Corsou. Kiermen e no ta algo cu Aruba so lo bay carga, pero e gasto grandi, ta e compania priva mes. Por bisa pa Aruba, hooguit un inversion di mas of menos 500 mil florin. Ta un inversion minimal pa un proyecto asina grandi.
Autoridad portuario
Esaki no ta un container haven. E ta full un otro sorto di proyecto. E companianan priva mes ta bisa cu nan ta prefera pa nan traha e waf, nan mes ta bin cu nan cosnan. E ta caba hopi mas lihe, nos tur sa esey. Y tambe e ta sali hopi mas barata. No ta e haven convencional manera APA etc. Ta full un otro tipo di proyecto. E ta puur riab e Fast Ferry.
E ferry
Tin diferente modelo traha. Un Fast Ferry tin un turnaround di 30 minuut, cual ta esencial. E ferry mester yega y den 30 minuut sali bek. Cu otro palabra, esaki ta pone cu eigenlijk bo ta wak Aruba, Corsou manera un pais e ora ey. Diripente bo pais ta bira mas grandi. E Fast Ferry ta bira un highway e ora ey. No ta bay wak solamente riba e parti di turismo. Claro bo ta bay haya turista, como tambe localnan. Pero e parti comercial ta bay aumenta asina hopi cu lo bay tin un fluho enormemente riba dje. Ta papiando di ferry nan di 120 meter grandi. No ta un ferry chikito cu ora bo ta riba lama bruto bo ta sinti’e. Ta Fast Ferrynan cu ta nabega den lamanan bruto cu ta proven technology caba. Por ehempel na Islanan Canaria, cu ta travel entre e shete islanan y cu tin lama mesun cos cu Aruba tin.
No por bisa cu ta Fred Olssen ta esun cu ta bay oper’e, pero si ta un di e interesadonan cu nan tin e experiencia den dje. Nan mes a indica cu nan mes lo kier haci cierto cosnan y asina sigur ta cumbini nos.
Tarifa
No por duna un prijs ainda riba dje, pero e lo ta hopi mas economico cu un ticket di avion. Ta calcula pa bay bin, e lo ta menos di 100 florin sigur. Esey ta loke e minister por a bisa.
Den mey ora
Ta asina cu ta un proyecto cu a wordo proba. E ta funciona otro caminda caba. No ta algo cu ta bay inventa. E tey caba. Cu e por logra, sigur cu si. Tin tecnologianan nobo caba cu ta haci’e posibel. Ora bo haci un aplicacion pa bay subi e ferry, ya caba bo ta wordo controla ken bo ta, etc. No ta na Aruba so, Corsou tambe ta haya bo datonan di biaha pa controla. Asina ey bo ta facilita tur eseynan delanta. E ora bo ta haci diferente control necesario pa asina e fluho bay. Diamars tabata tin un townhall meeting y nan tabata mustra e videonan con esey ta funciona, con e hendenan ta drenta e Ferry enz. Ta algo cu tey caba. Ta nos mester percura pa tin e facilidadnan y asina e por funciona.
