Diabierna Cas di Cultura a celebra su sesenticinco aniversario cu un bunita acitivad. “Sperando pa nos por haya hopi mas decada di e icono aki di Aruba, nos cas di cultura, nos herencia,” segun Vicky Arens, director di Cas di Cultura. Nan a dicidi pa hacie completamente diferente. E siman aki tabata un siman pisa na Cas di Cultura cu cinco show grandi, anto a logra toch pa hinca e evento aki dentro di e programa danki na e trabao extraordinario di e team di Cas di Cultura.
Henter e team a crea esaki hunto pa crea algo ful diferente cu un show normal. A sinti pa haci algo un tiki autentico y ‘loco’ segun Arens pasobra semper ta organisa diferente tipo di conmemoracion y esaki mester bira un tiki los pa e celebracion pa e team tambe.
Noush a toca musica for di comienso te na final di e actividad, tabatin presencia di Su Excelencia Gobernador di Aruba, Alfonso Boekhoudt y tambe Minister Xiomara Maduro pa celebra e momento aki cu Cas di Cultura. Tur hende presente a haya un recorido di Cas di Cultura su historia y evento organisa den pasado, di e oprichting, di e statuut, y tambe un actividad interactivo pa haya sa for di e publico kico arte ta nifica pa nan.
Siegfried Dumfries, director di Departamento di Cultura tambe tabata presente pa e celebracion. “Un momento hopi importante pasobra ta e unico teatro nacional cu nos tin na Aruba y tambe nos unico teatro den region di Caribe.” Ta hopi importante pa duna e plataforma aki pa por eherce arte y cultura, haya su importancia.
E publico a presencia un light show, experienciando partinan di e pasado, presente y futuro pa reflexiona con bo kier wak arte, kico ta nos identidad y nos cultura. “Nos ta tras di cortina duro bezig cu renobacion.” Awor aki ta haciendo un recaudacion di fondo silencioso unda cu ta acudi na esnan cu por haci donacion grandi, na fundacionnan, na Hulanda, pa haya e mayoria di locual mester.
Na fin di otro aña lo haya sa cuanto a recauda y cuanto mester ainda pa finalisa e proyecto.
