A entrega presupuesto 2024 na tempo mienstras tanto e tin 2 luna drumi na Parlamento. Un presupuesto cu tin yen di spirito den dje. Un presupuesto sigur no realistico. E motibonan pakico no por a trata e presupuesto den Parlamento ta obvio. Na prome luga pasobra nos ministernan ta di biahe.
Ta conoci cu na final di aña nos pueblo ta hopi ocupa cu diferente evento festivo y no lo paga mucho tino kico gobierno y parlamento ta haci. Esaki t’e momento mas oportuno pa gobierno y parlamento, manera un ladron den anochi, pasa e medidanan cu ta warda pueblo na 2024. Ora pueblo realisa cu tin mas medida riba lomba di pueblo, ya ta laat.
Riba pagina 73 di e presupuesto 2024 ta papia di e trato igual (gelijke behandeling) y mas abao ta papia di e geregistreerd partnerschap cu ta bisa cu mester regla e derechonan suplementario cu lo mester reduci e desigualdad. Esaki kiermeen cu mester adapta e geregistreerd partnerschap p’asina e matrimonio di mesun sexo bira realidad. For di 8 di september 2016 cu amienda 7 a bira realidad cu 11 voto na fabor y a sigui dia prome di maart 2021 cu 17 parlamentario a vota na fabor nada no a cambia.
A pesar di a papia cu prome minister nada a pone cambia di su pensamento pasobra el a laga traha e Aruba Nacional Gender Policy, el a hiba un discurso na Universidad di Aruba 23 di october 2022 y dia 3 di november 2023 na Den Haag, nos prome minister a hiba discurso riba e tema di igualdad di genero.
Gobierno a sigui su curso pa implementa e ley aki. Na Merca ora a cuminsa implementa e ley na scol, a bin hopi problema. E luna di orguyo a bira un luna caminda e pueblo Mericano a rechasa e ley aki. Nos por corda cu Target, Walt Disney y Budlight a perde mas cu 40 biyon di dollar den menos di 10 dia pasobra e pueblo Mericano a bisa ta basta. Aworaki na Aruba nos gobierno ta sigui pusha e ley aki y e ora ey nos por wel di lubida riba nos turista Mericano. E turista Mericano lo no bishita un isla cu su estilo di bida ta manera Sodoma y Gomora. Nos unico pilar economico, esta nos turismo ta na peliger.
Nos por mira cu parlamentario Berlis kier bin duna un splicacion kico ta ideologia di genero y cu su partido MEP ta para y kere ciegamente den e igualdad di genero. Berlis ta sigui sostene su partido MEP cu a firma e Sustainable Development Goals cu ta consisti di 17 punto y e gender equality cu nr 5. Por mira claramente cu e manifestacion y e 18 mil firma no a pone gobierno cambia di pensamento. Riba dje e ta hinca den e presupuesto 2024. Por lo menos 16 parlamentario lo sostene e ley aki. Partido CURPA ta kere Berlis ta debidamente na altura di e plan diabolico cu su partido MEP ta forma parti di dje esta e Sustainable Development Goals pero e no tin e hombresa pa bisa su gobierno ta basta.
Parlamentario Berlis a permiti e actonan diabolico aki yega nos scolnan caba y kier sconde tras di e manifestacion pero gobierno ta hari nan den nan cara. E gobierno aki no ta interesa den e bienestar di nos criaturanan y tampoco pa mantene e diseño orginal di matrimonio. Nos gobierno no kier hala for di e mal caminda cu nan ta aden. Hesus mes a bolter mesa den e tempel ora contra di ley di Dios a haci cas di su TATA Celestial cueba di ladron.
Nos ta bibando den tempo biblico. Dios su bengansa ta na porta. Ley di Dios pa partido CURPA no ta negociabel. Partido CURPA t’e unico alternativa.
