Diasabra ultimo a tuma luga e semi- final di playoffnan di Fedeveta 40 plus na RCA. Manera menciona nos tawata en espera di un bon futbol y e prome wega cu tawata e revancha entre Nacional cu Riverplate no a desapunta.
Den e prome mita Nacional a ataca via na medio camponan y a pone e defensa di Riverplate bou un presion inmenso y asina nan a comete un foul net pafo di e area penal. Aki hungado Valdo a los un tiro cu a resulta di ta e prome gol. Na di 2 mita nacional a keda pone presion y via un otro tiro liber e mesun hungado Valdo a dobel e score na 2-0 pa Nacional. Pero di eynan Riverplate a pone un presion enorme tambe pa empata y bo por a wak un crecemento grandi den e ekipo di Riverplate y asina mediante 2 tiro liber y e ultimo den e ultimo minuutnan a empata e wega. Tawata di lamenta cu despues di wega e mesun hungado di nacional Valdo a haya un carchi cora di referee pa dissent (desacuerdo/falta di respet).
Segun reglamento di Fedeveta a bay over na tiro penal directo unda Riverplate a gana cu e score di 4-3 den penalty
Referee principal Jimmy Valderaman cu su asistentenan Rambo Flanegin y Ive Samondjan a traha duro pa tene e wega bon bou control
E di 2 semi final a entre Dakota Starsz y Teachers United. Aki Dakota cu a supera den number di hungadonan y experienca a bay cu un Victoria di 4-0. E prome mita Dakota a domina pero Teachers a purba todo por todo pero e defensa di Dakota tawata hermeticamente cera.
Referee Central Ive Samoendjan y su assistentnan Rambo Flanegin y Ben Lucker a mantene bon control di wega.
Mester bisa cu e spirito di FEDEVTA a reina despues di wega ora cu tur hungado a mescla cu otro y sigui fiesta e semi- finalnan hunto.
Riba e combinacion di potret por wak e accion di diasabra pasa
