No ta mucho tempo pasa cu Aruba a experencia un situacion peligroso, caminda cu for di oficina di minister di husticia, ta yama un recherche directo y bis’e ki caso e tin cu duna prioridad pa investiga. Un situacion cu no ta cuadra den nos estado di derecho, mirando cu for di unico instancia cu polis ta ricibi ordo, ta di Ministerio Publico.
Un coordinado di Minister Rocco Tjon a haya ta bon di yama un recherche y bis’e cu e tin cu duna prioridad n’un caso y cu e posibel sospechoso lo ta un ruman di un ex-parlamentario di AVP. E recherche di berdad a sigui e ordo pero a pon’e riba un procesverbaal cu for di Cocolishi a dun’e ordo.
Ora a puntra minister di husticia, el a sigura cu ni e y tampoco su coordinadonan a yama y duna ordo. Minister-president, sin lesa e proces-verbaal a hinca man den candela pa Tjon y sigura cu su gobierno no ta traha asina. Nan propio parlamentario di MEP, Alvin Molina a laga ambos minister cay. Durante un entrevista cu 24ora.com, el a indica cu ta berdad cu oficina di minister a yama polis y duna ordo.
E tempo ey a puntra altocomisario di polis pa su reaccion riba e situacion aki. E no tabata na altura di e caso y a keda di bay busca mas informacion. Diamars atardi a topa cu, drs. Ramon Arnhem, altocomisario di Cuerpo Policial pafo di Centro di Husticia. Entre tanto algun luna a pasa y el a bay busca mas informacion pa comparti. Segun Arnhem, mirando cu tin un keho oficial entrega na Landsrecherche door di mr. Desiree Croes, tin cu laga esunnan responsabel p’e investigacion tuma nan tempo p’asina saca afo di berdad kico a sosode.
Pa Arnhem, no ta aceptabel pa ningun minister mete y duna ordo, t’e ta manda of por sigui ordo solamente di Ministerio Publico. Arnhem ta di opinion cu e mes no por opina mucho mirando cu tin un investigacion tumando luga.
