Nos flamante Minister di Husticia, alabes e minister di menos vota den henter Conseho di Minister, un biaha mas ta den noticia. No necesariamente pa su bon trabou, sino pa su blundernan cu e ta comete tur dia.
Claro, un minister hoben sin experencia politico, ta claramente cu e lo comete un cantidad di blunder. Por ehempel riba su metemento directo den Cuerpo Policial. No ta mucho siman atras cu e minister a haya ta bon di duna ordo directo n’un miembro di e ekipo elite di polis, esta Team di Aresto pa busc’e y hib’e aeropuerto. E minister a biaha pa Hulanda y tabatin mester di un cabe’i boto.
Mirando cu su chauffeur no ta traha den weekend, el a hay’e ta bel e polis pa nan hib’e aeropuerto cu auto di Cuerpo Policial. Na su yegada, a señal’e ta baha for di e auto Jeep color shinishi numera A-11744, kende ta pertenece na KPA di e seccion AT. Ramon Arnhem, altocomisario di e Cuerpo Policial ta di opinion cu su cuerpo no ta fungi como UBER pa hiba ningun minister aeropuerto.
E ta compronde berdad cu e ta mustra straño locual a sosode, aunke cu e no tabata na altura kico a sosode. E altocomisario no ta hay’e asina “erg” cu un miembro di team di aresto ta hiba un minister aeropuerto cu auto di polis.
