Pa encuanto boso manera di biba di antes, boso pone un banda e homber bieu cu ta corumpi conforme e pasionnan engañoso. Pa boso ta renoba den e spirito di boso mente,y pa boso bisti e hende nobo cu a wordo crea den husticia y santidad berdadero (Efesionan 4:22).
Kico ta pasion engañoso y na unda e a cuminsa? Awel pasion engañoso a cuminsa for di den paraiso, caminda satanas a gaña Adam y Eva cu si nan come di e fruta, cu nan wowo lo habri y cu nan lo ta manera Dios. Pero te awe tur hende mester di Dios, pasobra Dios ta Todopoderoso.
Pasion engañoso ta envolvi un triki cu ta priminti, pero no por cumpli. E no ta duna e resultado cu bo ta spera di dje, tur locual e ta haci ta desvia hende for di e caminda corecto y pone culpabilidad riba hende. E nomber mes ta splica tur cos caba cu e ta un engaño.
Awor aki pasion engañoso a drenta mundo na un nivel hopi halto, den cual e ta hala multitud di hende bay cu ne. Pasobra pasion engañoso, miho conoci como deseo engañoso, ta pone hende bisa pa no husga nan pa asina nan permanece den scuridad.
Bo tabata sa cu pasion engañoso por pone hende cay cerca? Ora un homber adulto tin relacion cu un mucha muhe menor di edad. Esey ta un pasion engañoso, pasobra e ta contra ley di Dios y di husticia di riba tera. Tur locual ta pedofilia ta pasion engañoso.
Ora un homber/muhe tin relacion pafo di su matrimonio ta un pasion engañoso, pasobra e ta peca contra Dios y tambe kibra su famia. Pasobra e pasion ey no ta trece nada bon. Uzo y benta di droga ta un pasion engañoso cu por hiba hende na adiccion, prizon, enfermedad mental y hasta morto.
Relacion sexual entre homber cu homber y muhe cu muhe ta un pasion engañoso cu ta un abominacion dilanti di Dios, cu ta trece culpabilidad riba hende. Y si nan no arepenti bijbel ta bisa claramente cu nan lo no hereda reino di Dios (1 Corintionan 6:9+10).
Matrimonio mesun sexo ta un pasion engañoso, pasobra locual ta e productividad cu Dios ta demanda di hende (Genesis 1:27-28) no ta posibel den e tipo di relacion ey. Pero pa sistema di mundo e ta para riba mesa pa aproba, aunke e palabra di Dios ta mustra tur cos cu claridad.
E curason ta mas engañoso cu tur cos y totalmente corupto, ken lo por compronde? Ami Señor ta scrutiña curason, Mi ta samina mente, pa duna cada un segun su conducta, segun e fruta di su echonan (Jeremias 17:9+10). Pero si nos wak bon tur e asunto di genero ta draai riba e asunto di sexo, y eynan e enemigo a drenta cu tur maña y maldad, pa asina plama pasion engañoso riba henter mundo.
Ta algo tristo ora hende cu sano huicio ta apoya maldad y inmoralidad, sabiendo cu nan ta condena bida di otro hende, simplemente pa fanatismo of poder. Nos mester haci tur locual ta posibel pa evita cu nos hobennan lo cay den pasion engañoso y asina desvia for di e berdad. Pasobra e diabel ta mik riba tur locual ta hubentud, pa asina nan cay den su gara, y despues e ta destrui nan (Juan 10:10).
Mirando cuanto falsedad y mentira ta lantando rond mundo, nos tin cu corda riba e palabra di Dios cu ta bisa: Door di boso perseverancia, boso ta gana boso alma (Lucas 21:19).
Laga nos haci hopi oracion, pa asina nos por wordo libra di tur pasion engañoso.
