Ta celebra Dia Mundial di Awa dia 22 di maart di cada aña y su principal obhetivo ta genera conscientisacion riba e importancia di cuida e recursonan di awa rib’e planeta, un elemento vital pa bida di tur especie di Tera.
Cu e celebracion di e dia aki, a pretende pa duna na conoce e crisis mundial di awa y e problematica cu miyones di persona ta confronta, cu no tin acceso na suministro di awa potabel, como tambe e medidanan urgente cu mester tuma al respecto.
ORIGEN
Nacionnan Uni a proclama Dia Mundial di Awa na 1992. A celebra e aña ey na Rio de Janeiro, e Conferencia di Nacionnan Uni riba e Medio Ambiente y Desaroyo. For di eynan a surgi e proposicion, siendo 1993, e prome aña dje celebracion.
Despues a tuma luga otro mencion manera e Aña Internacional di Cooperacion den e Esfera di Awa 2013 y e Decenio “Awa p’e Desaroyo Sostenibel” 2018-2028. Tur esaki ta remarca e idea di Nacionnan Uni cu awa ta fundamental p’e desaroyo y paz mundial.
Awa ta un recurso natural componi p’e moleculenan di hidrogeno y oxigeno, cu ta indispensabel pa bida. E ta un bon considera como e oro likido di e planeta y cu ta haci posibel cu tur e especienan terestre sigui crece y desaroya cada dia. For di eynan e importancia pa evita su gastamento. E ta un recurso limita, den cual ta haci falta un mayor tumamento di consciencia pa su preservacion, pasobra si algun dia e yega na bira scars, e lo trece consecuencia ireversibel pa humanidad.
AWA: UN DERECHO FUNDAMENTAL PA BIDA
Awa ta un derecho fundamental p’e preservacion di bida, den tur su formanan. Considera como un derecho humano, e recurso natural valioso y indispensabel aki, no ta yega di forma sigur na un gran cantidad di persona den diferente pais, vooral n’esunnan mas pober, unda cu awa potabel no ta accesibel.
Di acuerdo cu Nacionnan Uni, e poblacion mas afecta t’esun cu falta recurso economico, unda cu saneamento di awa ta un luho berdadero, solamente posibel p’e sociedadnan mas avansa y e paisnan desaroya.
Mas di un tercio di e poblacion mundial no ta gosa di e servicionan di awa potabel sigur, loke ta traduci na mas di 2 mil miyon di persona cu no ta ricibi awa di calidad den nan cas. P’e rason aki, tur aña ta muri un cantidad di hende homber, hende muhe y mucha.
P’e refugiadonan, e personanan sin hogar y tur cu ta biba den pobresa extremo, no tin ningun posibilidad pa gosa di e recurso aki, cu ta asina vital pa bida.
Pa eradica miseria y tur e consecuencianan cu e ta bin cu ne, e Organisacion di Nacionnan Uni ta busca alternativa pa haci di e mundo aki, un luga mas viabel pa tur. Esaki solamente lo alcansa a traves di e yamada na desaroyo sostenibel.
TEMA 2023: SEA E CAMBIO
Den e celebracion di e dia aki anualmente, ta selecta un lema of tema central. E lema di e Dia Mundial di Awa 2023 ta: “Acelera e cambio” cu un yamada na accion pa sociedad: “Sea e cambio.” Ta trata di pone di relieve e necesidad urgente pa acelera e cambio pa logra cu awa yega na tur e skinanan di e planeta, hasta esunnan mas pober.
A crea un campaña mundial pa anima e personanan tuma medida pa cambia e forma cu ta uza awa. Cu e lema: “Sea e cambio cu bo kier mira den mundo” ta pasa e responsabilidad di e maneho di awa na cada un di nos.
