Campeonato Heineken fast pitch di Aruba Softball Bond dedica na nbaluartenan Jacobo Jansen y Gilbert “Nando” Maduro a continua riba veld di Dragon Hitters na Barcadera.
Bon asistencia di publico cu un bon ambiente e equipo di Black Joker a manda un señal kla den su promer wega. Black Joker no a respeta e veterano leyenda Antonio”Tony” Warner kende ainda ta contruibiendo na e deporte di softball den A-Klas propinando Tony asina su promer derota. 
Wega tabata 2-1 te den di 3 inning momento cu Black Joker a rally pa habri e wega for di otro. Black Joker a bati como equipo di 25-10 pa un averahe di 560. Black Joker 14 careda, 10 hit, 0 error. The Prodigies 1 careda, 1 hit, 4 error. Pitcher ganador ta resulta Bryan Courtar kende a cubri henter e ruta mientras Tony Warner kende ta ricibi relevo di Hector Winterdal ta bay cas cu e derota. Bryan Courtar ta lansa 44 bola, 43 stike pa un total di 87 lansamento ta regala 6 base por bola propinando 5 strike out pa un ERA di 1.75. Tony Warner ta tira 32 bola, 44 strike bon pa 76 lansamento propinando 4 ponche y ta regala 3 base por bola permitiendo 6 hit.
Hector Winterdal ta releva 2/3 parti den di cuater inning ta lansa 30 bala, permitiendo 6 careda limpi y 4 hit. Mihor bateadornan pa Black Joker ta Oslin Bergrok di 4-4 cu 4 rbi y 3 careda anota mas un homerun, Bryan Courtar 3-2, Juan Carlos Maduro y Danilo Croes di 2-1. Pa The Prodigies e unico hit a wordo bati pa Albert Croes kende porcierto a anota tambe e unico careda. Campeonato ta continua dialuna awor 13 di mei na Pos Chiquito unda pa 715pm den A-Klas Blackhawks lo enfrenta Piratas mientras pa 9pm Royal Power lo topa Celebrities e equipo cu a titular campeon 2018 den A-Klas kendenan a subi pa AA. Campeonato fast pitch a la carga!!!
