Amantenan di e deporte y pasatempo mas gusta pa nos Rubianonan, esta Domino, ta cla pa start sali. Aruba Domino Bond tin e placer di presenta e Campeonato Nacional di Domino Balashi 2024.
Aruba ta keda invita pa diabierna awor, dia 26 di april 2024, pa e gran apertura, cu lo tuma luga na Club Sport Boys, cuminsando pa 6.30 di anochi cu un bunita desfile di e 9 teamnan di Domino organisa na Aruba.
E campeonato Nacional di Domino Balashi 2024, lo conta e aña aki cu e siguiente nuebe teamnan: Old Parr Dt, GoldStone Dt, Extreme Dt, Sport Boys Dt, Eagles Dt, Trappers Dt, NoordStars Dt, Ottleys Dt.
ADB ta yama bon bini na Royal Domino Team, cu lo haci nan debut den campeonato 2024.
Lo hunga e campeonato organisa aki na diferente cede rond di Aruba, tur diabierna y diadomingo.
E aña aki un bes mas Aruba Domino Bond ta conta cu contribucion di e compania cu mas tin nos deportenan local na pecho, cu su productonan mas gusta y consumi durante y despues di wega, esta Balashi y Dewars.
Aruba henter ta invita pa apertura y e weganan paasina apoya tur e teamnan di Domino organisa.
E aña aki, Aruba Domino Bond ta haci un peticion pa fanaticada yega mas na e weganan, como cu tur miembro di ADB ta bezig ta prepara pa e di 20 campeonato mundial di Domino organisa pa FID (Federation International di Domino) cu lo conta cu participacion di riba 400 hungado di paisnan manera, USA, Spaña, Russia, Brazil y mucho mas.
E pregunta ta si Noordstars Dt lo sa di retene nan titulo di campeon un biaha mas, of nan rival Old Parr Dt lo tin algo di bisa? E team nobo Royal DT cu sin sali, ya ta lagando teamnan cu temor y ansiedad lo por sorprende?
Aruba domino Bond ta warda tur amantenan di domino na Club di Sport Boys pa e gran apertura.
