Tin un situacion cu UEA ta mal contento y hasta por bisa cu mediador lo a faya cu nan, door di coopera of yuda pa por a yega na toch e CAO cu tin na Elmar.
Mediador di Gobierno, Anselmo Pontilius a splica cu mediador di gobierno y ningun otro autoridad of institucion no por coopera pa torno na ningun contracto colectivo.
Un contracto colectivo ta regla den un landsverordening, esta un ley hopi solido y cu e partidonan cu a firma e contracto colectivo ey, ta nan dos hunto por propone pa haci cambio y e sindicato tin e obligacion pa atende cu su miembronan.
Si esey ta e declaracion di parti di UEA, su presidente ta totalmente robes. Dia 4 di April tabata tin un reunion na oficina di mediador di gobierno cu mediador di gobierno a convoca riba peticion di UEA, reclamando gerencia cu gerencia lo a torno na un articulo den contracto colectivo vigente entre UEA y NV Elmar. Den e reunionan eynan mediador tabata hopi cla cu ta mustra cu cualkier cambio a mustra gerencia y dirigencia di UEA cu cualkier cambio cu nan kier haci den contracto colectivo, nan tin un obligacion di sinta na mesa cu dirigentenan di UEA, aunke cu nan ta representa e minoria di e trahadonan.
Sindicato STA a gana e referendum mas cu un aña pasa. Pero sindicato STA ta e partido cu por negosha e proximo contracto colectivo. Esey no ta kita afo cu e sindicato na nomber di su miembronan, por reclama cu no cumplimento di e CAO. E cumplimento di CAO ta condicionnan di trabao di e trahadonan en general. Miembro y no miembro. Segun Pontilius, esaki ta prome biaha cu e ta scucha esaki. Dia 4 di April tabata enfatico, mustrando gerencia, sr. Koolman riba nan responsabilidad pa loke ta e ley riba un contracto colectivo. No por ta cu lo ta wordo insinua cu mediador no por. Simplemente cualkier mediador y cualkier instancia cu permiti esey lo ta un acto contra ley. Ademas, si e sindicato of cualkier sindicato cu sinti cu e dunado di trabao a torno unilateralmente of via un otro canal na un articulo di un contracto colectivo. E ultimo palabra semper un hues lo por dicidi si esey ta un practica corecto of ilegal.
Kico por pasa
Segun Anselmo Pontilius, pe tabata cla dia 4 di April. A splica gerencia cu tanten cu UEA tin un contracto colectivo cu gerencia di NV Elmar, gerencia di NV Elmar tin un obligacion di cumpli cu e peticion di sindicato UEA aunke cu nan a keda cu masha poco miembro y nan ta den minoria. Esey no ta e punto.E punto ta cu UEA oficialmente tin un contracto colectivo cu e dunado di trabao y di acuerdo cu ley bo tin cu respeta e acuerdo ey. Pontilius a splica cu ta nan derecho y a consulta cu departamento di labor, cual nan a haya declaracion di e director di e departamento, riba entre otro interpretacion di e ley riba contractonan colectivo.
Tin di compronde cu diabierna nan a reuni cu director di departamento di labor. Mediador no a haya ningun reclamo di UEA despues di dia 4 di April si mediador a faya of laga di faya. Faya ta nada otro cu si ta un eror a comete humanamente, mester admiti cu ta asina. Cerca mediador no por ta nunca pasobra mediador di gobierno no tin ningun autoridad, pa loke ta un contracto colectivo. Contracto colectivo ta wordo cera entre un of mas sindicato, y un of mas dunador di trabao. Mediador di gobierno por yuda yega na un contracto colectivo. Pa lansa esey, ta nifica cu ta un grito sin pia y sin cabes.
Hopi discusion
Na momento cu e sindicato STA a gana e mayoria, tabata evidente cu tabata tin un cantidad di proceso andando. Uno ta reorganisacion di e compania y na e mesun momento kehonan riba algun articulo di contracto colectivo. A splica e partidonan bon cla cu di un contracto colectivo vigente y e contracto colectivo ey mester wordo respeta pa tur partido, te ora cu negosha un contracto colectivo nobo. Si e partidonan ta kere cu tin articulonan cu ta contra ley den e contracto colectivo, e caminda ta pa bay corte y pidi hues pa anula un articulo, pasobra lo prueba cu lo ta contra ley.
Pero esey no ta e caso y no a mira ningun caso den corte, pues segun Pontilius, evidente ta, tin un discusion cu gerencia a cumpli cu un articulo cu UEA y gerencia di Elmar a firma y gerencia di Elmar a cumpli cun’e basa riba un carta cu sindicato STA a manda.
Mediador di gobierno no tin ni arte ni parte den esaki, Pontilius a conclui.
