Diahuebs den oranan di atardi a tuma luga ceremonia di entrega di certificado na un grupo di bintiun bombero cu a sigui e curso di Manschap B cu exito. Minister di Husticia Rocco Tjon tabata presente pa haci entrega di diploma.
Emilio Geerman di Management Team, a splica cu ta prome biaha cu a entrega den Cuerpo di Bombero e diploma aki cu ta Manschap B Caribisch Nederland 2.0. Esaki e modelo nobo di opleiding cu ta duna a base di e cooperacion nobo cu tin entre e islanan CAS (Corsou, Aruba y Sint Maarten), BES (Boneiro, St. Estatius y Saba) cu Hulanda.
E diploma aki ta cambia e rol cu nan tin riba un truck, unda antes nan tabata ayudante. Awo nan por fungi como chauffeur y haci otro tareanan mas.
No mester pasa e curso bek pero si ta bay haya bijscholing pa ora cu e procesonan cambia.
Den e curso aki a participa 22 miembro di Cuerpo di Bomber y 21 a pasa e examen e prome biaha, y e otro tin chens riba her-examen. E curso ta simplemente un forma pa nan sigui crece. A bini instructornan di Hulanda y Sint Maarten pa duna les den model nobo y siña nan anda cu e truck. E curso a dura a un aña completo.
E sistema aki ta uno bon pasobra ta wordo uza den tur e islanan di Caribe Hulandes. Y e grupo aki ta e prome pa traha cu e procesonan nobo.
Geerman ta felicita e graduadonan pasobra esaki tabata un trayecto largo cu nan mester a sigui, mientras cu na mesun momento nan tabata traha tambe. Algun parti tabata un berdadero reto pa e participantenan.
Denter di algun aña nan lo por participa den curso pa bira bevelhebber. E funcion aki ta e capitan riba e truck di Brandweer. Awo tin 8 Bevelhebber y 4 ploegchef. Pero tin varios cupo habri. E aña’ki ainda tin pensa pa cuminsa cu un curso cu 12 participante, y na 2024 lo tin otro klas mas. E idea ta pa den e prome kwartaal di 2025 mester tin 24 capitan nobo.
