Belgica a impone riba e debutante Panama, danki na un gol di Mertens y un doblete di Lukaku (3-0). Apesr di domina e partido for di un principio, e goleada di Belgica a yega den e di dos parti cu un disparo den e escuadra di Mertens y un cabesaso y un disparo pica di Lukaku.
Den e prome parti, Panama tabata por a resisti e atakenan di Belgica, danki na e portero Jaime Penedo. E keeper, e mas destaca di e ekipo, a wanta un awasero di tiro y a evita cu e Belganan a delanta den varios ocasion. Mayoria di e intento tabata protagonisa pa Hazard y Mertens, cu un unico tiro di Lukaku.
Husto despues di e pase pa e vestuarionan, un gol di Mertens a delanta Belgica den e di 48 minuut. E hungador di Napoles a firma un golaso cu un disparo pa e escuadra sin cu Penedo tabata por a haci demasiado.
E resto di e di dos parti Belgica a sigui ataca e porteria di Panama. E debutantenan den e mundial tabata purba di probecha nan contra, pero den poco ocasion nan a logra menasa Courtois.
Den e di 68 minuut Lukaku, solamente dilante Penedo, a peña un centro di De Bruyne y a aumenta distancia cu 2-0. Algun hungada mas leu, e Belganan a probecha un contra y Witsel a pone un bala largo pa Lukaku kende, tirando un picada, a supera e portero. E di 95 minuut a yega cu Belgica buscando e di cuater y confirmando su condicion di faborito.
Foto: FIFA©
