E club di servicio Aruba Lions Club cu e aña’ki ta celebrando 72 aña di existencia, e siman aki a lansa un produccion musical. Ivan Croes, presidente di Aruba Lions Club, durante un conferencia di prensa, a papia di e tema aki.
Un di e proyectonan cu nan ta sinti nan mes orguyoso di dje ta cu e banda cu a lanta na inicio di aña, esta Aruba Lions Club Band. Durante luna di maart nan a pasa diferente Cas di Anciano pa deleita e grandinan cu nan musica. “e tabata un di e proyectonan hopi grandi di nos pa nan, pa mira an goza y e placer di disfruta. Asina nos a logra alegra nan dia,” Croes a splica. Esey tabata e momento cu a surgi e idea pa lansa un disco compacto.
E disco compacto ta consisti di 8 cancion y den e produccion a haya hopi cooperacion di e banda MELODIA. Rubin Ponson, un di e miembronan mas nobo di Aruba Lions ta hopi conoce den mundo di musica, formando parti di MELODIA. E ta un forma pa recauda fondo dirigi na e actividadnan pa comunidad di Aruba.
Diferente cantante a colabora den e produccion cantando un di e cancionnan. Y tur ta cantantenan conoci na Aruba. Nan tin por ehempel Tattoo (Richard Quandt); Cecelito Lopes; Inky Richardson; Robert Maduro; Claudius Philips; Robert Jeandor y Ito Dania. Henter e grabacion tabata “live”, tocando “live”.
E produccion ta un gesto pa comunidad, pero pa solamente 25 florin, bo ta haya diferente artista riba un solo CD y alabes bo ta contribuyendo cu e trabou cu Aruba Lions Club ta haci pa comunidad.
