Comienso di e aña escolar 2019 – 2020 ta den porta. Aki algun tips pa yuda abo como mayor y bo yiu cu e preparacion di e aña escolar nobo.
Comunicacion
Kisas bo yiu ta ancioso pa bay scol bek, kisas no. Bon comunicacion entre abo y bo yiu ta importante den su preparacion pa bai scol bek.Bo por papia cu bo yiu y splike kico tur e lo por spera den e aña escolar venidero.Su klas, maestro/a, e materianan cu e lo ricibi y asina e ta haya un bista di kico lo ta bai spere.
Bo por dune entusiasmo dor di menciona cosnan positivo di scol cu e ta gusta. Purba papia di su amigo/a nan y si ta su prome biaha na un scol, dun’e tips con pa sera amistad. Si e tin un ruman mas grandi, lag’e comparti su experencia cu ne, naturalmente ta importante pa monitoria esaki pa e ruman inform’e di e cosnan leuk.
Tambe bo por puntr’e kico ta loke e mes a haya falta di dje den su vakantie y kico e ta gusta di scol. Dune un sentimento di seguridad cu e lo ta den bon man y splike ken lo ta hib’e y busk’e (mayoria bes) na scol.Comunicacion cu bo yiu ta importante. Corda di scucha kico e tambe tin di bisa y elabora ariba esey segun e mucha su edad y nivel.
Drumimento
Drumimento tambe ta hopi importante no solamente pa e por presta bon na scol pero tambe pa e desaroyo sano di bo yiu.Durante periodo di vakantie e rutina di drumi por a cambia un poco, pa e motibo aki nos ta recomenda lo siguiente:Cuminsando awenochi, laga e yiu drumi mas trempan cu custumber; Percura mainta pa hopi claridad den su camber y anochi menos luz posibel. Asina bo ta yud’e pa adapta su oloshi interno.
Segun American Academy of Pedriatics e cantidad di ora cu un mucha di:
2-3 aña mester drumi ta entre 12-13 ora
3-6 aña mester drumi entre 10-12 ora
6-12 aña mester drumi entre 9-11 ora. (mas grandi menos ora)
Soño ta duna energia na tanto mucha como adulto. E ta yuda bo yiu siña bon na scol. E ta mantene saludabel y den bon beis!
