Ariba Diasabra 7 di September, 2019 organisacion WOW Aruba lo presenta pa prome biaha e conferencia informativo “Dare To Be”.
“Tribi Di Ta” lo ta e topico di dia, tribi di ta bo mes, tribi di sigui e soño cu bo tin añas ta pensa riba dje, tribi di ta creativo, tribi di inverti den bo mes, tribi di ta empodera, tribi di ta inparabel. Sigur un mainta unda cu invitadonan lo wordo inspira pa accion, sin ningun distincion di educacion of profesion.
Cu e conferencia aki, damanan di WOW Aruba kier ofrece e comunidad di Aruba, hende homber como hende muhe e oportunidad di atende un evento unda cu oradornan local y internacional lo presenta topiconan di actualidad pa cu desaroyo personal y profesional. Meta principal ta pa brinda studiantenan, recien graduadonan, hobennan profesional y cualkier otro persona cu ta desea di inverti den nan mes, un evento unda nan lo disfruta un mainta di inspiracion pa cu accion den cualkier area den nan bida na un prijs accesibel.
Programa di Conferencia “Dare To Be” ta uno interactivo y informativo. Como orador local, experto den desaroyo di personalidad Sharleen Tromp lo trece dilanti con pa bo descubri bo miho cualidadnan y con pa utilisa esakinan den e miho manera pa bo avance y asina yega mas cerca di bo metanan.
Gabriela Mueller di Switzerland, un di e oradornan internacional invita na “Dare To Be”, lo presenta,“Impact and Action, 5 Seconds Decisions”, e instrumento perfecto pa asumi retonan di decisionnan diario.
Frances Rios for di Puerto Rico, lo comparti su ideologia di “Ready, Set, Fly” inspirando accion, desaroyando bo mes como un “game changer”, dispuesto y cla pa cualkier reto.
Como Panelistanan invita, Dare to Be ta conta cu CEO y Presidente di AHATA Tisa La Sorte, hoben comerciante Rigo Croeze, encarga cu e legado familiar Urataka Center, hoben politico y consehero di maneho na Oficina di Relacionnan Europeo y Reino Gerlien Croes, Psicologo y Directora di Mind+ Diana Salcedo, Marc Figaroa Director di Aruba Ports Authority N.V. y experto internacional den Career Transition Daniel Botero. Tristan Every, entrepreneur den e ramo di tecnologia y Larissa Bermudez, profesional den media y periodismo lo modera e panel durante e mainta.
Conferencia “Dare To Be” lo tuma luga na Alhambra Ballroom for di 8:00 di mainta te cu 1:00 di merdia. Costo di registracion ta Afl. 75.00, interesadonan por comunica directamente cu miembronan di WOW Aruba via facebook: https://www.facebook.com/
Organisacion WOW Aruba kier extende palabra di gradicimento na tur sponsor cu ta haciendo e evento aki posibel. Divi All Inclusive Resort, Setar N.V., Aruba Bank N.V., Elite Productions, Romar Trading, Click Print N.V., Emco, Subway, Pelican Nest, La Quinta Beach Resort y Futura Lab.
