Jeandrick van der Biezen, miho conoci como Omar Pierce, recientemente a firma un contracto cu e empresa di entretenimento KJ 74 Entertainment, di e famoso pelotero di Grandes Ligas Kenley Jansen, hungando pa Boston Red Sox.
Tur cos a cuminsa durante un desayuno cu su primo y amigo, papiando di su futuro den mundo musical. Den e combersacion aki a bini dilanti e nomber di Jansen, kende na e momento ey tabatin solamente un artista cu nan ta representa. E amigo presente tabata Chadwick Tromp. Di un joke pa traha cu e empresa di Jansen, esaki a bira realidad danki na Chadwick.
Jeandrick a cuminsa produci for di su 13 aña y cu su 16 aña a cuminsa pa traha cu mas artista, y asina a cuminsa acumula conocemento. El a gusta esaki pasobra el a cera conoci cu diferente tipo di ritmo cu loke nan tabata kier.
Despues a drenta e fase unda cu e tabata kier a purba como cantante, drentando di e forma aki un otro fase di su incursion den mundo di musica.
Palabranan grandi e tin pa loke el a sinti na momento cu el a ricibi su prome contracto cu e compania, e emocionnan tabata hopi grandi.
Tempo mi tabata chikito mi no a pensa dei bay asina profundo den musica, aunke el a crece mirando su tata den e ramo aki. Pero el a siña cu cada biaha e ta siña algo nobo y awo e kier bay den e fase di inspira otro hendenan.
Awo cu el a firma, e kier “polish” su mes pa ta diferente cu otro artistanan. E ta kere cu mas e graba, su carera lo sigui crece.
Pa loke ta e genero e gusta R&B y a cuminsa gusta dancehall cu un poco di pop mescla den dje.
Jeandrick van der Biezen of Omar Pierce ta masha entusiasma y ta spera cu por presenta basta cancion den e proximo seis lunanan. Hopi lihe lo tin uno riba mercado. “Mi a bisa tur hende cu mi ta bay logra y mi a cuminsa. Mi t’ey pa mi y mi famia,” el a bisa.
