Minister di Salubridad Publico, Dangui Oduber, a anuncia recientemente cu dia 22 di januari e proceso di destaho publico ta cuminsa pa otorgacion di permisonan na negoshinan (local y internacional). Esaki ta pa tur negoshinan cu ta interesa pa cultiva y/of procesa cannabis cu e proposito final pa yega na un producto medicinal. Un proceso serio y transpararente cu ta cumpli cu tratadonan internacional y reglanan di bon gobernacion, asina e mandatario a duna di conoce.
A menciona cu na momento cu cannabis medicinal a bira parti di e acuerdo di gobernacion na aña 2017, cu mesora a cuminsa explora e posibilidanan pa legalisa e uzo di cannabis medicinal y tambe e parti di cultiva y procesa. Prome cu a yega na e parti di otorga permiso pa haci pa cultivacion di cannabis, Gobierno a haci un estudio di kico e industria aki lo por nifica pa e economia di Aruba. Kico e industria aki lo por crea na cuponan di trabou y tambe entradanan pa Gobierno.
E industria di cannabis ta algo nobo ainda na mundo. Un estudio na aña 2018 a mustra cu na aña 2018 e idustria di cannabis medicinal a produci 12.5 biyon dollar mundialmente y pa aña 2024 esaki lo bira 63 biyon dollar pa aña segun pronosticonan. E mandatario a expresa cu Aruba ta un di e poco paisnan na mundo y den Caribe cu tin un vision progresivo pa cu cannabis medicinal.
Finalmente minister Oduber ta informa cu e registracion pa participa na e destaho ta caba dia 16 februari 2021. E gruponan cu tin interes ainda tin 2 siman pa registra y participa den e proceso aki.
