Diabierna anochi, Security di Renaissance Marketplace tabata tin mannan yen cu un adicto ambulante femenino, kende tabata haciendo fastioso den Cuba’s Cooking. Despues cu a hala su atencion pa sak’e for di e luga, el a sali, dal un turista, sigui bay ariba. Na altura di e brug di Renaissance, a mande abao y a yama polis pa atende cun’e na e sitio.
Na e mesun momento e dama aki tabata bula dilanti di auto, papia cosnan bruha. Polis a presenta y papia cun’e. Alabes e adicto aki na mas cu un ocasion, a menasa e securitynan cu morto. No a keda nada otro cu detene y hib’e warda. Ki dia e fenomeno di adictonan ambulante ta caba? Ta di compronde cu nan ta hende berdad, pero pa nos propio bienestar y di nan, ta bon pa tuma accion y pone nan bao di curatela pa asina nan por rehabilita y sali for di e bida di droga cu nan ta aden.
Nos por corda cu algun aña pasa Ministerio Publico tabata tin mas di 100 dossier di adictonan cu mester a pone nan bao di curatela, pero no a tende nada mas di esaki.
Y cu adictonan, den pleno centro di ciudad, caminda cu nos turista y tambe nos ciudadanonan mes ta transita, ta un peliger y un berguensa, cu na un luga cu nos ta yama un Aruba di cinco strea, no por controla e situacion aki.
Ta di spera cu e mandatario encarga por tuma accion urgente, pasobra asina aki si, nos mes ta core cu nos turistanan.
