Prome cu tur cos, asina cu gerencia di Directie Volksgezondheid Aruba (DVG) a sinti cu tin movecionnan straño pa cu e proceso di vacunacion y pa emiti certificado di vacunacion, mesora a entrega keho na Veiligheidsdienst Aruba (VDA0 y a bay Landsrecherche. A bay siguridad nacional pasobra a sinti cu e repercucion di tin pruebanan falso den circulacion di hendenan cu nunca a vacuna, ta un peliger pa interes general y ta hinca nos den un problema serio cu Gobierno di Hulanda, cu na su turno ta sincronisa e registro di Aruba hunto cu esun di henter Europa. Pues, awo tin un cantidad di hende cu tin certificacion Europeo, pero cu no a vacuna, sino a paga empleadonan di DVG pa haya un prueba di vacunacion”bou man”!
Te cu awor, Ministerio Publico a confirma e noticia den prome di primicia di 24ora.com, den cual tin dos sospechoso encarcela. E investigacion, segun Ministerio Publico, ta den man di tanto Landsrecherche pero tambe ta ricibi sosten di Cuerpo Policial Aruba. No por bisa ainda cuanto sospechoso tin, pero si a confirma cu tin bastante mas na bista!
E acusacion ta cu tin corupcion den escala grandi cu e asunto aki di vacuna. E caso ta asina grandi, cu Ministerio Publico a dun’e e nomber di Wanglo. Ta sospecha cu tabatin hortamento di placa efectivo na aeropuerto ora cu turistanan paga 75 dollar cash pa nan PCR test. E otro asunto, mas serio ainda, ta cu algun hende tabata tuma placa bou mesa pa por procesa pruebanan di vacuna na hendenan cu nunca a vacuna. Consecuentemente, e hendenan ey awo ta cana rond cu un carchi, a inclui nan den e sistema digital y e Aruba Health App, sin cu nunca nan a tuma ni e prome ni e di dos vacuna!
Tin dos sospechoso den e caso aki, un di nan ta Gerald Olivir. Ningun di dos ta ambtenaar, sino a haya contract di Gabinete Wever-Croes pa bay traha den DVG den e proyecto aki, cu a hasta conta cu sosten financiero di gobierno di Hulanda. Ora cu a sinti cu ta bin problema, a kita nan for di trabou, aunke cu tur a haya un carta di recomendacion firma door di e Management team di DVG, pues haciendo comosifuera cu nan ta empleadonan ehemplar y cu nan a bay pasobra nan contract a caba y no pasobra nan ta corupto.
Awor cu nan a kere cu e caso a fria, nan no a spera bishita inespera di Landsrecherche na nan porta di cas y a detene nan mesora. E chens ta grandi cu mas hende lo cay den e caso pasobra ta un asunto serio cu repercucion grandi pa imagen di henter DVG dilanti partnernan local y internacional.
Minister Dangui Oduber a confirma e investigacion aki algun dia pasa caba, ora cu nos colega Marko Espinoza a haci e pregunta durante un conferencia di prensa. E mandatario a bisa cu e caso ta den man di Ministerio Publico y e no por duna mas comentario riba un caso andando pa no stroba investigacion.
