Resientemente Stichting Studiefinanciering Curaçao (S.S.C.) den estrecho koperashon ku SIGE a organisá un atardi di informashon pa studiantenan ku ta bai studia den region.
Durante e seshon aki a duna informashon tokante rekesitonan ku studiantenan mester tene kuenta kuné ora ta bai studia den region. Minister di Enseñansa, Siensia, Kultura i Deporte (ESKD), sra. Marilyn Alcalá-Wallé komo titular di gobièrnu ku a sòru pa studiamentu den region e aña aki ta posibel atrobe, tambe a hiba palabra durante e atardi ameno aki.
Minister Marilyn Alcalá-Wallé a gradisí S.S.C. pa nan tremendo trabounan ehersé. Minister di ESKD a duna di konosé ku gobièrnu ta konsiente ku e kantidat di studiantenan ku ta bai studia den region ta oumentando den un tempu rápido, ta trese retonan kuné i ta pidi mas atenshon.
Algun reto den e kuadro aki ta pa protehá nos studiantenan kontra institutonan di estudio den region ku ta entregá diplomanan no-rekonosé i studiantenan ku ta krea debenan astrónomiko ku studiamentu den region. Gabinete Rhuggenaath ku S.S.C. ta trahando riba un mihó maneho i servisio pa nos studiantenan.
Den e kuadro aki Gabinete Rhuggenaath ya ta serando akuerdonan ku institutonan rekonosé den region, ku ta brinda gran deskuento riba “collegegeld”. Pa medio di e akuerdonan aki, studiantenan di Kòrsou ta studia na un preis faborabel i ku mas benefisio. E debe ta bira un invershon pagabel na momento ku e studiante terminá su estudio.
E aña aki gobièrnu ya a sera akuerdo ku e.o: Brock University, Bishop University i Wayne State College. Ahinda tin diferente insititutonan di estudio den region rekonosé i di kalidat haltu, pendiente pa sera akuerdo kuné pronto. Na momento ku sera akuerdonan ku e institutonan aki, e studiantenan di Kòrsou ku ya ta studiando na e institutonan tambe ta benefisiá for di esaki.
Minister Marilyn Alcalá-Wallé ta desea tur nos studiantenan hopi éksito ku nan reto nobo i ta sigui traha na bienestar di nos hóbennan, ku enfoke riba enseñansa kual ta forma e base di tur desaroyo den un sosiedat.
