Desde diamars ultimo, Cas di Aruba (Aruba Huis) ta trahando segun orario di “zomer”. Aunke cu trahadonan eyden ta procedente si Aruba y conoce calor, toch a dicidi pa manda tur trahado cas desde 12’or di merdia, debi na calor inmenso den e ultimo dianan aki na Hulanda. Parce cu e temperatura den e edificio e siman aki a subi y surpasa 30 grado Celcius. E coleganan di Cas di Sint Maarten a sigui e ehempel di Aruba y tambe a cuminsa traha mita dia so awo. Sinembargo na Cas di Corsou si nan ta trahando normal. Ta bon pa menciona cu na Hulanda e “Arbowet” ta obliga doño di trabou pa tuma medidanan si salud di trahadonan ta ma peliger, debi na calor of frieu.
