Departamento di Cultura Aruba a ricibi, diahuebs siman pasa, e tristo noticia cu un baluarte den nos mundo musical a bay laga nos den persona di señor Pascual Kelly. Pascual ta un persona cu no ta desconoci den nos comunidad.
Informacion cu DCA a ricibi ta cu sr. Pascual Kelly a nace dia 17 di mei 1947 y a fayece dia 12 di april ultimo na edad di 70 aña. For di edad hopi hoben di 13 aña el a cuminsa toca e instrumento di Mandolin. Cu e edad aki el a haci presentacion hunto cu Rudy Croes, Tommy Croes, Rueben, Micheal Lopez, d.f.m. e.o. pa La Reina Juliana tempo cu Su Mahestad a bini na Sint Jozef School na Santa Cruz. Despues Pascual a cuminsa toca guitara y cuarto tambe cu su 13 aña.
Na edad di 16 aña El a toca cu ‘Trio Caribe’. Cu 17 aña, Pascual a haya su prome Fio (Violin). Ta manera mesora el a comprende con pa toca esaki y a domina e Fio. Cu e mesun edad di 17 el’a toca Fio cu ‘Mariachi Aruba’.
Despues cu Pascual a stop di toca cu ‘Mariachi’ y el a lanta su mesun banda cu yama ‘Los Campesinos’. Segun sr. Harry Croes, Pascual a participa na Festival di Dande bou di e nomber ‘Pascual y su Tribu’ hunto cu su dos rumannan Pedro Kelly y Maximon Kelly pa despues cambi’e pa ‘Los Campesinos’.
Pascual a cambia e nomber ‘Los Campesinos’ pa ‘Mariachi Los Campesinos’ y asina a sigui cu e genero di musica Ranchera. Ora nan a haya mas tocado, nan a cambia e nomber pa Mariachi ‘Mil Amores’. Cu Mariachi ‘Mil Amores’ nan a biaha pa: Punto Fijo, Caracas, Venezuela, Corsou (5 biaha) y Boneiro (4 biaha).
Despues di e temporada di ‘Mil Amores’ un par di hende di e agrupacion a stop di toca. Caminda cu Sr. Pascual Kelly a bin ta yama e agrupacion: ‘Emperio’. Cu ‘Emperio’ El a biaha pa: Sint Maarten (5 biaha), Boneiro (5 biaha) y Puerto Rico (1 biaha).
Pero Pascual a dicidi di tuma un tempo inactivo, anto net den e tempo ey el’a haya un accidente. Den e accidente aki el a kibra su man cu a pone cu el a keda sin toca pa 1 aña y tambe den e temporada ey el a perde su mama. Esey tabata entre 2004 pa 2005.
Pascual a cuminsa toca guitara bek na iglesia y asina a bin ta toca e fio (violin) bek, pero no manera antes. Esaki a sosode despues di 1 aña y mei cu e tabata inactivo.
Asina el a sigui su trayectoria y hunto cu e musiconan Maximon Kelly, Ramiro Hernandes, Rafael Lacle, Tico Oduber y Soledad Rijna, nan a biaha pa Boneiro na aña 2009.
Ademas sr. Pascual Kelly ta un cantante for di tempo cu e tin 17 aña te cu 63 aña. Pascual ta toca delaster un instrumento di cuerde, incluyendo Harpa cu tin 36 cuerde. Banda di tur esaki sr. Kelly tabata toca ‘First Pan’ di ‘Steelband’. Pascual tin mas o menos 20 trofeo y certificado, cu tambe ta hopi por cierto.
E tabata e prome persona, hunto cu sr. Buchi Boekhoudt, kende a haya un reconocimento for di gobierno . Y te cu recien Pascual tabata hopi contento cu el a siña señor Ricky Kock toca Fio pa awendia cu su yiu homber, Omar Kock, ta studiando pa profesor di violin na Puerto Rico.
Hopi tocadonan di Fio tin na e districtonan di Ayo, Paradera y Piedra Plat cu a pasa cerca Pascual cu a siña nan.
Director, Staf y Personal di Departamento di Cultura Aruba, bou auspicio di Ministerio di Finansa, Asuntonan Economico y Cultura ta expesa palabra di condolencia na su famia, amigo, conocinan y musiconan na Aruba. Mundo musical a perde un gran baluarte cultural.
