Diamars atardi na edificio principal di SVb a tuma lugar un conferencia di prensa den cual SVb a duna un aclaracion riba e escogencia di e edificio “Arulex” pa muda nan servicio di Docter di Control pa Funcionarionan Publico (ambtenaar) y e servicio di Callcenter esta Poortwachters.
Svb a constata cu ultimo dianan a surgi un discusion publico encuanto un desicion tuma pa SVb. Y SVb a considera importante pa yama e conferencia aki pa asina duna un declaracion al respecto, trece aclaracion riba e proceso, esaki cu e meta di salbaguardia e integridad di e Banco di Seguro Social, SVb.
Manera ta conoci, desde 1 di juli 2007, SVb a tuma tareanan pa control medico pa e sector publico for di BGD. E tempo ey a acorda cu gobierno cu mientras cu SVb no ta dispone di un espacio adecua, lo sigui duna servicio for di e edificio di van Leeuwenhoekstraat. Ademas, SVb a haya disponibel un parti di e edificio pa asina ubica departamentonan cu na e momento ey tabata acomoda den un trailer na Eagle.
Durante e añanan cu SVb tabata ocupa e edificio aki, a constata cu e edificio tabata deteriorando. Conciente di e situacion di e edificio na van Leeuwenhoekstraat y conciente di e situacion di departamentonan acomoda temporalmente pa mas di 20 aña caba den trailer na Eagle, SVb a dicidi na 2016 cu lo bay construi un hala nobo patras di e edificio di SVb na Eagle.
Den e hala nobo aki lo acomoda nos departamentonan cu ta den e trailernan, ademas lo muda e departamentonan na van Leeuwenhoekstraat pa Eagle. SVb ta den e proceso di realisacion di e plannan aki. E diseño ta cla y e mapanan tecnico ta kedando cla. Pa por realisa e construccion aki, SVb a dicidi di cumpra un franha di tereno di gobierno. Na e momentonan aki e traspaso ta na notario.
Lamentablemente e situacion di e edificio na van Leeuwenhoekstraat no a coopera y a sigui deteriora. Asina dia 19 di februari a constata cu pidanan grandi di e structura di e edificio a cuminsa bin abao. Despues di un evaluacion dia 20 di februari, a tuma e desicion cu no ta permiti ningun actividad mas den e edificio. Confronta cu e situacion aki, SVb a cuminsa mes un dia cu buskeda di un espacio adecua pa por sigui brinda su servicionan.
E espacio cu SVb ta busca no ta puramente pa oficina. E espacio cu nos ta busca mester cumpli cu exigencianan specifico pa SVb. Entre otro e espacio mester ta adecua pa fungi como sala di espera pa un minimo di 40 persona, mester tin un camber di consulta amplio pa nos dokter di control, bañonan publico separa di bañonan di empleado, acceso pa clientenan den rolstoel, suficiente parqueo y oficinanan cu acceso directo di lus di pafor.
Esaki nan ta e criterianan cu SVb a mantene y lo sigui mantene den buskeda di espacio adecua. Ora SVb a cuminsa busca espacio dia 20 di februari, esaki tabata bao un presion enorme. Tanto e clientenan y empleadonan tabata sumamente preocupa pa nan salud. Tur dia tabata puntra ki dia ta sali pa motibo di e sentimento di insiguridad. Un sentimento cu gerencia tabata desea di atende mas rapido posibel. Si na inicio a pensa cu lo tabata facil pa haya un espacio adecua, mientras e dianan tabata pasa no tabata hayando e loke ta necesario pa SVb.
Pa resumi e proceso cu a wordo haci pa haya un edificio adecua ta cu a bishita y a inspecciona 14 espacio na diferente parti di playa. Aki por menciona di Wayaca te na Eagle y becindario. Espacionan no tabata cumpli cu e necesidadnan y prioridadnan di SVb cual nan ta entre otro un wachtkamer pa minimal 40 persona, baño publico, bon ventilacion y lus. E unico espacio cu a cumpli cu e rekisitonan aki ta e ultimo edificio cu a evalua cu ta Arulex Building.
E desicion pa acepta e edificio di Arulex pa acomoda temporalmente, te ora SVb su hala nobo na Eagle keda cla, tabata un desicion di gerencia di SVb, saliendo exclusivamente di e interesnan di SVb, manera a formula den e exigencianan. Y desicion aki tabata un desicion exclusivamente di SVb, sin consulta politico. A cana un proceso caminda a evalua e opcionnan basa riba criterianan saliendo di servicionan di SVb.
Den fin di siman a sali publica un entrevista cu SVb den prensa riba e ultimo desaroyonan pa loke ta e reubicacion di su servicionan. Gobierno e momento ey a tuma nota di e desicion di SVb y a acerca SVb pa reconsidera su desicion. SVb a reconsidera su decision y mester menciona cu SVb su unico intencion tabata esun di busca un solucion adecua pa un situacion di emergencia cu a presenta. SVb ta lamenta cu su decision a causa cierto incomodidad pa cu gobernacion, kende ta e cliente principal pa e servicionan aki. Dilanti di tal situacion, SVb ta reconsidera su decision y a cancela ARULEX. Gerencia di SVb ta agredecido na Arulex pa a duna tur colaboracion.
Esaki nifica cu entrante ayera SVb a cuminsa su buskeda atrobe pa un espacio adecua. No por indica cuanto tempo lo tuma pa haya un lugar adecua. Mientras tanto SVb ta pidi su disculpa na e clientenan cu no por ricibi e servicionan bao di e circunstancianan di custumber. Manera cu SVb tin un lugar nobo for di cual ta duna e servicio, lo informa comunidad.
