Dia di Rey, 27 di april 2018, Aruba Triathlon Association lo organisa e di 58 edicion di e 10K Boulevard Race.
Esaki ta un careda cu anualmente ta conta cu participacion di alrededor di 600 participante, local y internacional. Hopi ta e atletanan cu ta regresa pa participa na e careda aki.
E careda lo start 5:30 pm y bay direccion rotonde Marriot Hotel/Bakval pa Sasakiweg, na altura di Palm Beach Plaza lo bira na man drechi pasa dilanti High Rise Hotels, na altura di ex-Westin/Riu Antilles lo bira na man drechi direccion Eagle Beach y Low Rise Hotels te na luznan di trafico na cruzada Sasakiweg, akinan lo bira na man drechi direccion rotonde Wendy’s bay termina na altura di parkinglot di APA.
Inscripcion por tuma lugar:
– Online registration link riba FB di Aruba International 10 Boulevardloop y via website di Aruba Triathlon. Pago MESTER tuma lugar na oficina di IBISA.
– Por pasa na oficina di IBISA y por keda yuda eynan cu Online registration y haci e pago di biaha.
Tuma bon nota cu ta considera registracion como completo y confirma ora e pago keda haci na Ibisa!!
Prijs di inscripcion ta Afl. 35,= pa atletanan local y US$ 35,= pa atletanan internacional.
Ultimo dia pa inscribi y haci pago lo ta dia 20 pril 2018.
Dianan 25 y 26 di april 2018, di 4:30 pm pa 7:30 pm, por pasa busca number di participacion/bib (cu chip) y dry-fit shirt. Esaki lo tuma lugar na oficina di Aruba Ports Authority situa riba L.G. Smith Boulevard.
Corda trece e recibo di pago y un muestra di identificacion (ID) na momento di busca bo materialnan pa participacion! Tambe tene na cuenta cu (pa size di) tshirt, esaki lo wordo reparti sigun esun cu yega prome.
Lo bay tin bus disponibel, saliendo for di Parkinglot di APA (Aruba Ports Authority) pa hiba atletanan pa e start line. Busnan lo sali pa 4:00 pm, 4:15 pm y pa 4:30 pm e ultimo bus lo sali.
Mester registra (check in) prome cu subi bus. Atleta MESTER tin su bib bisti p’e subi bus!
Altetanan cu ta bay di biaha Malmok/start, ta registra (check in) na Malmok mes. Aki tambe ta cuminsa registra pa 4’or di atardi. Lo tin borchi pa indica e lugar di Start.
Premiacion ta como lo siguiente:
Trofeo y premio efectivo di Awg. 1.000,–, Awg. 750,–, Awg. 500,– pa e prome 3 (tres) atletanan masculino y femenino cu termina e careda.
Tambe lo tin trofeo pa e prome 3 atletanan di cada categoria di edad.
Categorianan ta como lo siguiente:
Masculino: 14-19, 20-29, 30-34, 35-39. 40-44, 45-49, 50-59, 60+
Femenino: 14-19, 20-29, 30-34, 35-39. 40-44, 45-49, 50-54, 55+
Di antemano nos kier manda un danki grandi na e sponsornan di e evento aki cu a y ta yuda pa e evento aki por tuma lugar. Esakinan ta Banco di Caribe, Ennia, Lotto pa deporte, Aruba Ports Authority, VNO, Setar N.V., The Palm Tours, Atlantis Submarine, Albo Aruba, Total Services, C3 Critical Communication Caribbean, Meteoro portable Toilets, Ibisa y Tri -Bike Aruba.
Tambe na Cuerpo Policial, grupo di Bikers y sin lubida e boluntarionan cu lo yuda e dia aki!!
