Conta cuenta y canta cerca nos grandinan

Biblioteca Nacional Aruba ta organisa otro edicion di su proyecto ‘Conta cuenta na Casnan di Anciano’. Esaki ta un programa cu a resulta exitoso y ta sigui organisa tur aña.

Durante 3 luna hunto cu autor, poeta y contador di storia ta bishita e diferente casnan di anciano pa presenta un progama di un ora cu storia, musica y entretenimento. E biaha aki e gira ta cu autor Marco Christiaans, actriz y docente sra. Emerita Emerencia y actriz sra. Faritah Luidens.

Den e di dos parti di e programa ta ofrece un sketch interactivo tocante custumbernan di antes presenta pa algun empleado di biblioteca, cu acompaña musical di sr. Patrick Christiaans.

Di e manera aki biblioteca kier contribui (cu promocion di buki) na tene actividadnan alegre y informativo pa nos grandinan cu ta biba den e diferente Cas pa Anciano manera e.o. Paviljoen San Pedro, Huize Maris Stella Savaneta, SABA San Nicolas y Cas Marie Savaneta. Durante e proximo 3 luna cada cas ta haya bishita di biblioteca y un autor of contador di storia. Na total tin 12 bishita riba programa. Coordinacion di e proyecto ‘Conta Cuenta Na Casnan di Anciano’ ta den man di un bibliotecaria y Quota Club Aruba ta ofrece un contribucion financiero pa cubri algun gasto.

Actriz Faritah Luidens ta conoci pa e personahe na television ‘Tica Bashabou’. Faritah tin diferente talento, entre nan canto y teatro. Marco Christiaans ta contador di storia y autor di e buki ‘Perseverancia’. Emerita ta un actriz, docente di scol, entrenador di produccion teatral. Cu e personanan creativo y artistico aki un presentacion dibertido y diverso ta garantisa.