Tur cos ta cla pa Corte sigui cu tratamento di e caso di asesinato di sra. Shasha na su cas na Wayaca.
Dia 17 di maart ultimo sorpresivamente e caso, cu tabata en espera pa sentencia un siman mas laat, a aparece riba rol. Hues Angela a splica cu el a adelanta e fecha no pa duna un sentencia, pero pa motibo cu e tabata sinti necesidad di mas informacion cu e no a logra haya den e procesverbaal. Pa e motibo ey a dicidi di manda e caso bek pa Hues Comisario. E Funcionario aki ta e unico cu por manda pidi registronan di e cuenta di banco di e acusado Po Sing, pa mira si e tabatin motibo (financiero) pa cual e kier a mira e tanta di dje morto, of pa atrak’e y horta su placa, ya cu supuestamente tabata conoci cu e ta cana cu hopi placa efectivo y cu na e cas tin un caha fuerte.
E acusado Jefferson a declara cu su hefe a mand’e comete e atraco pasobra e tabatin mester di placa pa saca un container di mercancia of material. Tambe Hues kier informacion riba e estado di civil di e victima na momento di su fayecimento, si e tabata casa of divorcia. Tambe kier scucha e tata di e acusado Po Sing y kier acceso na copia di e testament di sra. Shasha. Pues diabierna awo pa 8.30 di mainta e tratamento lo sigui cu e documentonan pidi y den sala mes ta bay interoga un testigo.
