Dia 21 di april, e departamento ‘Organization, Governance and Management’ (OGM) a organisa un presentacion virtual cu organisacion local Respaldo Aruba. E presentacion aki a ser duna door di Sr. Lex de Jong (Operations Manager) en conexion cu un ‘consultancy assignment’ di e studiantenan di prome aña di OGM den un materia cu ta yama “Disciplinary Approaches to Organizations”.
E aña aki ta e di dos biaha cu ta colabora cu e organisacion aki pa/cu e tarea aki di e studiantenan. Pa e ‘consultancy assignment’, e studiantenan mester formula recomendacion pa Respaldo for di e perspectiva y basa riba e teoria di sea psicologia of antropologia y ley. E recomendacionnan ta dirigi na con Respaldo por mehora y ser fortifica como dunador di servicio den e area di salud mental.
Durante e presentacion Sr. de Jong a duna un splicacion general di e organisacion y na final di e presentacion, e studiantenan a haci pregunta dirigi na Sr. de Jong y Sra. Vishnadutt di Recurso Humano cu tambe a atende e presentacion. E tarea ta culmina cu un presentacion cu lo ser duna pa Respaldo door di e studiantenan. E tarea aki ta un ehempel di con e studiantenan di OGM ta aplica teoria cu nan ta studia den e contexto local. Na mesun momento ta pone atencion na e desaroyo di cierto habilidad profesional manera pensa critico, duna presentacion y colaboracion den ekipo.
Departamento di Organization, Governance and Management ta gradici Respaldo pa e colaboracion y sosten apesar di e situacion actual di COVID-19. Ta gradici specialmente Sr. de Jong y Sra. Vishnudatt pa e sosten y nan contribucion na e crecemento di nos studiantenan.
Pa mas informacion tocante OGM, bishita e pagina di Universidad di Aruba na http://www.ua.aw/OGM y e pagina di Facebook/https://www.facebook.com/UniversityofArubaOGM/
