Un biaha mas autoridad a tira man riba algun persona kende ta dedica nan mes na e negoshi di transporta hende for di Venezuela pa Aruba. E biaha ‘ki a tira man riba nan prome cu nan a logra bandona costa Venezolano.
Autoridad di Estado Falcon bou guia di “Fuerzas de Acciones Especiales”(Faes) di Polis Nacional Bolivariano a tene un investigacion y asina a logra detene tres persona sospecha di contrabanda di hende den e bario Villa Marina, municipio Los Taques.
Segun un informe cu a keda publica den e corant NotiFalcon, e tres personanan deteni ta forma parti di un gang cu ta hiba e nomber El Marcial, cual ta dedica nan mes na e delito di traficacion di hende, principalmente pa e islanan ABC. A sigui e trabou di e grupo aki y asina despues di un investigacion largo a logra yega na captura e sospechosonan net na momento cu nan tabata trata di bandona Villa Marina den un boto peñero blanco cu direccion pa Aruba, den forma clandestino.
Tambe nan a confisca un vehiculo Zephir blanco, cual nan tabata uza pa move den e bario.
E caso aki ta bini casi un siman despues cu na Falcon a detene un persona cu ta organisando e tipo di biahenan aki.
Autoridadnan di Falcon a haya informacion for di Aruba cu mayoria di e biahenan ta sali for di Playa Adicora, asina a cuminsa un investigacion di e caso di dia 21 di augustus. Despues di investigacion y denuncia entrega, a detene un persona di e area y a confisca un celular. Den esaki a bin topa cu combersacionnan cu ciudadanonan deteni na Aruba pa caso di traficacion di hende. E ta un piscado conoci di e area y identifica como José Gregorio di 29 aña di La Vela de Coro y ta biba na Playa Adicora.
GASOLIN
Ademas di traficacion di hende, tambe tin casonan di contrabanda cu a wordo frustra, manera esun di dia 5 di augustus ultimo.
Guardia Nacional a logra recupera 24 bari di plastic cu tabata contene un total di 1440 liter di gasolin. Nan tabata patruya na costa di Paraguana, Medano Blanco, ora cu a mira e barinan scondi den e matanan. Nan ta supone cu esaki mester a bay di forma ilegal pa Aruba.
FRONTERA
For di inicio di aña Gobierno Venezolano a tuma e decision pa cera frontera cu Aruba. Un decision cu despues a wordo hala aden, pero Aruba na su turno a anuncia cu e frontera lo keda cera. Esaki combina cu e crisis na e pais Venezolano, a causa un salida grandi di e ciudadanonan cu ta bay en busca di un miho bida. Tin gruponan grandi cu ta cuminsa e aventura aki na pia pasando via frontera cu Colombia. Otro nan ta tuma riesgo mas grandi via lama, tratando di drenta Aruba of un di e otro islanan Hulandes y tin biaha cu resultadonan fatal.
Foto: NotiFalcon
