Aña pasa Kansas City Royals a firma e beisbolista Cal Maduro, kende awor ta combina estudio y ta hunga baseball na Kansas City Royals Academy. E team di Reino Hulandes a yama Cal Maduro pa forma parti di nan rooster di pitcher pa competi den e U-18 Baseball World Cup na Sur Korea entre dia 30 di augustus pa 8 di september proximo. Diabierna el a biaha di Santo Domingo pa Sur Korea pa topa e seleccion diadomingo awo.
Carlos Maduro, tata di e hungado, a expresa di ta hopi contento y emociona, pasobra ta mira cu di chikito e ta bin ta trahando pa esaki. Den corto tempo cu el a wordo firma aña pasa, awo e seleccion U-18 a acerc’e mas o menos 2 siman pasa. Aki nan a inform’e p’e forma parti di e seleccion pa bay Sur Korea.
Na momento cu Cal Maduro a ricibi e noticia di ta den e seleccion, el a tuma contacto cu su tata y tabata hopi emociona. “Den bida tin ora bo tin soñonan. Esaki ta un di e soñonan pa por a logra di hunga pa Hulanda. Nos a pensa pa e clasico grandi, pero esey lo bin mas despues,” segun Carlos Maduro. Di forma parti di e campeonato aki tambe ta hopi importante, pasobra eynan ta haya e miho 12 teamnan di mundo den e categoria di 18 aña ta bay topa.
Desde cu a firm’e y el a bay Santo Domingo, e aña aki el a hunga su prome competencia di “Dominican Summer League” y el a bay hopi bon. Carlos Maduro ta orguyoso di e trayectoria di Cal Maduro, kende a picha den 13 wega y a salba 6 wega. Segun Carlos Maduro, nan lo bay busca unda por mira e weganan y trata di informa con ta bayendo pasobra den e seleccion di U-18 Cal Maduro ta e orguyo, e unico Arubiano cu ta forma parti di e seleccion.
Esaki ta prome biaha cu Cal Maduro ta hunga profesional cu Kansas City y di hunga den e seleccion ta plus punt p’e den e organisacion. Segun Carlos Maduro, nan ta spera cu e por haci un bon papel cu ta yud’e move mas lihe den e organisacion y cu e por yega liga mayor den baseball mas lihe. E trayecto di unda Cal Maduro ta pa liga mayor ta uno poco largo. E tin cu pasa diferente etapa pero esaki ta un boost y por yud’e den e trayectoria aki.
