Ban papia di nomber di pisca. Bo conoce bo piscanan? Un serie di articulo informativo cu ta ilustra algun pisca y nan nomber na Papiamento den cual Departamento di Agricultura, Cria y Pesca, conoci como Santa Rosa kier comparti y alabes haya informacion for di publico. Lesa na final di articulo con pa haci esaki.
Candelchi, Squirrelfish, Holocentrus adscensionis:
Candelchi en realidad ta referi na henter e famia di candelchi of otro bisa, ora nos bisa candelchi, nos kiermen varios diferente especie pero cu no ta distingui nan pa especie. Den e potret aki, nos ta mustrando esun mas comun den nos awanan cu na ingles yama quirrelfish of bou nomber cientifico Holocentrus adscensionis. Bou candelchi, nos na Aruba generalmente ta referi na tur e diferente especienan di candelchi. Tur ta parce otro y en berdad ta dificil distingui entre nan.
E famia candelchi e ora ta keda distingui pa e siguiente caracteristicanan. Nan ta cora te cu roos di color y hopi biaha ta mustra manera strepi di cora entre e scamanan a lo largo di e curpa. Nan tin spina duro y semper arma. Na hermana isla Corsou, sa yam’e bari di clabo, pa e motibo ey.
Den nos awanan tin 7 pa 8 tipo of especie presente y cu sa ser gara y mira ocasionalmente. Por distingui nan pa diferente marca manera color na spina dorsal of marca na curpa. Den e articulo aki no lo profundisa den esey.
Na Aruba:
Ta gara Candelchi riba rifnan of areanan cu structura den awa unda nan por sconde. Aunke nan ta prefera busca nan cuminda anochi, nan ta activo den dia tambe. Nan ta comibel y ta dushi hasa seco bros cu su lamunchi. E ta peculiarmente desafiante pa scama e pisca y p’esey e no ta un di e preferi nan cerca piscadonan. Nan ta biba hopi biaha den grupo.
Contacto cu nos:
Ta intencion pa periodicamente Santa Rosa saca mas informacion pa tocante di nomber di pisca na Papiamento. Si bo tin informacion of comentario pa engrandece conocemento of si ta desea informacion of topico specifico pa nos amplia ariba, por manda esakinan libremente na [email protected]. Si bo mes ta piscado y bo kier comparti bo captura di e pisca en cuestion, sea liber pa manda esaki pa nos considera public’e.
