Den e ultimo dianan a conoce yen di movecion y strategia politico di parti di gobierno pa asina partido mep trata di mantene nan voto den e proximo eleccion cu lo no ta mucho leu. Partido MEP ta consciente cu pueblo no ta nada contento cu tur e medidanan y pa evita posibel accion, a atende indexering y logra keda cla cu e indexering cu e sindicatonan.
Esaki ta e prome biaha den un tempo asina cortico y sin cu mester a subi caya cu e empleadonan publico a logra haya compensacion pa e perdida di compra. Den pasado empleadonan publico a bay den welga pa logra haya un ahuste di salario. No work no pay tabata aplicabel.
Esaki ta un logro historico of atrobe un maniobra politico unda a tira un has pa gana voto den e proximo eleccion? Gobierno a lubida riba esunnan cu riba pensioen. Parce cu e pensionadonan no ta conta pa gobierno aki mas.
E strategia no a caba aki. Partido mep sa cu e tin un batata cayente na caminda esta matrimonio di mesun sexo. Partido MEP mester tene cuenta cu e partido mes, mescos cu nos pueblo, ta dividi pa locual cu ta trata e matrimonio di mesun sexo di un banda y di otro banda e posicion na fabor di su partner esta partido RAIZ. Anticipando riba e reunion den parlamento, partido MEP ta organisa un town hall meeting “Ban Topa” na sede di partido MEP. Esaki no ta casualidad, pasobra partido mep ta organisa e Ban Topa net un dia prome cu e reunion di parlamento caminda lo trata e ley di matrimonio di mesun sexo.
Informacion cu nos a ricibi ta cu lider di partido a yama caba un reunion cu e parlamentarionan di partido MEP riba e tema di matrimonio di mesun sexo. Segun nos por a compronde e parlamentarionan tabata instrui con nan mester vota dia 8 di mei 2024. Lo no keda nos di partido Curpa nada straño cu partido MEP vota contra di e ley di matrimonio di mesun sexo pa asina por saca probecho politico pa no perde voto di e pueblo cristian.
E pregunta ta keda na e pueblo Cristian si nan lo guli e hanzue y asina cay den trampa di partido MEP. Nan por gaña hende pero Dios conoce nan curason, pasobra no ta e mesun partido MEP cu den pasado a sostene e amienda 7 cu tabata introduci dia 8 di september 2016.
E amienda inicialmente tabata tira den bari sushi, pero ta lider di partido MEP conhuntamente cu democracia real y partido AVP a saca e amienda aki y transform’e den geregistreerd partnerschap. Dia prome di maart 2021 Parlamento di Aruba a vota pa introduccion di e geregistreerd partnerschap caminda 17 parlamentario a vota na fabor y solamente 4 a vota contra.
Historia lo mustra cu mayoria den partido MEP semper tabata na fabor di introduccion di e ley, pasobra na mesun momento cu ta haci comosifuera di tin obhecion contra matrimonio di mesun sexo, nos minister president ta laga traha e Aruba National Gender policy na mei 2022 a hiba un discurso riba e tema aki na Universidad di Aruba pa despues na Hulanda y a hiba un discurso riba e punto 5 di Sustainable Development Goals cu ta e igualdad di genero cu tin inclui e matrimonio di mesun sexo.
Nos ta den un tempo biblico y e politiconan cu ta kere cu nan por haci bofon di Dios lo tin cu wanta e consecuencianan. Locual cu bo sembra lo bo recoge. Lo bo no scapa di dje. E Sustainable Development Goals ta contra bienestar di e famia y ta contra di nos yiunan. Nos parlamentarionan supuestamente Cristian ta masha bon na altura di e agenda diabolico cu gobierno ta hinca aden. Aruba ta bay confronta momento hopi dificil y solamente si nos pueblo hala cerca Dios, nos lo ta libera y lo ricibi e bendicionnan di Dios. Nos di partido Curpa ta desea e clase trahado feliz dia di obrero. Partido Curpa e unico alternativa.
