Den un entrevista exclusivo, nos a conoce di cerca Kenville Kleinmoedig, un hoben profesional cu un mescla unico di experiencia academico y laboral, kende actualmente ta finalisando su master como coordinado di proyecto na Hogeschool Rotterdam.
Tambe e ta candidato number 18 pa Parlamento Europeo como miembro di e partido GroenLinks/PvdA.
Participacion p’e proximo eleccion di Parlamento Europeo
Como candidato den e proximo eleccionnan di Parlamento Europeo, Kleinmoedig t’e unico ex-candidato cu ta busca pa participa n’e ocasion aki. E ta indica cu e e ta pertenece na un partido politico cu ta pone atencion special n’e interes di e habitantenan di Caribe Hulandes. Sinembargo, e candidato ta reconoce e limitacionnan cu e islanan ta enfrenta den termino di influencia den Parlamento Europeo, subrayando cu a pesar di esaki, e obhetivo ta contribui positivamente n’e futuro di Europa.
Reto y oportunidad p’e islanan den Parlamento Europeo
Aunke GroenLinks/PvdA ta boga p’e interes di e islanan, Kleinmoedig ta señala cu historicamente tabatin grupo di interes cu tambe a mustra preocupacion p’e islanan, manera den e caso di Mito Croes y Nadja van Putten na 2009 y Samira Rafaela na 2019. Sinembargo, e falta di oportunidad pa participacion di e islanan ta sigui ta un obstaculo.
Fuera di esey, Kleinmoedig a resalta cu e proceso di registro p’e eleccion ainda ta presenta dificultad significativo. Mester registra riba un plaso determina, completa formulario, firma documento y den hopi caso, lidia cu e falta di recurso manera printer. E tipo di obstaculo burocratico aki ta afecta e participacion y tambe e ta indica riba e necesidad di simplifica e proceso den futuro.
Un representante pa Caribe Hulandes den Union Europeo
E entrevista ta conclui cu un discusion riba e importancia pa tin un representante p’e islanan di Caribe Hulandes den Parlamento Europeo. Kleinmoedig ta menciona ehempel di pasado caminda cu a rechasa e peticionnan di fondo p’e islanan door di Hulanda, mientras cu di parti di e Francesnan si a acepta nan. Esey ta demostra e relevancia di conta cu un candidato cu ta representa e interesnan di e islanan pa evita tal desigualdadnan.
Cu e proximo eleccion di Parlamento Europeo den tapara, Kleinmoedig ta spera un aumento den e participacion di e ciudadanonan y e speransa cu e comunidadnan cu tin interes comun, uni pa tin un bos y voto den e futuro di Europa. E deseo ta cla: cu mas ciudadanonan di e islanan eherce nan derecho di voto y cu nan preocupacion ta considera p’e lidernan Europeo.
