Dialuna mainta a habri y Parlamentario di Fraccion di MEP, Ricky Hoek a trece dilanti varios topico di relevancia pa e comunidad di Aruba. El a cuminsa haciendo referencia na e luna di conscientisacion contra abuso di mucha. Falta algun ora pa e luna aki finalisa, pero e parlamentario kier a elabora un tiki mas riba e trabaonan cu ainda ta andando y cu lo sigui pa loke ta trata e tema importante aki.
Hoek a declara cu algun dia pasa, Minister di Husticia y Asunto Social, Rocco Tjon a laga sa cu ta bay tin e curso di ‘Recherche Psycholoog’ y cu lo cuminsa den luna di mei. Nan lo haya un training riba con pa haci e investigacionnan na e miho manera, hisando e nivel di e profesionalnan. E parlamentario a sigui bisa cu esaki sigur ta un paso hopi importante pa loke ta combatimento y analisis di e casonan di abuso di mucha pa despues bay trata nan den corte.
Minister Tjon tambe a splica di e proyectonan riba tereno di husticia, specificamente pa loke ta Instituto Coreccional di Aruba (KIA). Na KIA a duna un capacitacion na e profesionalnan, specialmente den e ‘Jeugdafdeling.’ E profesionalnan pa medio di e training aki, ta keda certifica y registra den e base di dato di Hulanda pa asina mustra riba e nivel di profesionalisacion y di e curso cu nan ta haya cual ta uno sumamente halto, Hoek a indica.
E metodo di ‘U-Turn’ ta uno cu ta uza den Reino Hulandes specificamente pa e hobennan. E metodo aki ta duna guia y un cuido miho y dedica na e hobennan, yudando nan tambe cu e proceso di resocialisacion den comunidad. Ricky Hoek a expresa cu esaki ta un paso hopi importante mirando cu e ta yuda e hobennan bay bek den comunidad.
E proyecto piloto aki ta bay inicia dia 2 di mei. E profesionalnan lo core un periodo di stage pa pone den practica tur loke nan a siña. Despues di esaki nan ta bay sigui un plan specifico di sigui desaroya nan mes profesionalmente den e tereno aki. Parlamentario Hoek a manifesta cu akinan ta mira cu berdaderamente gabinete Wever-Croes II ta pone tur su atencion y enfoke riba combatimento di abuso di mucha y hoben.
PARLATINO na Corsou
Siman pasa, Parlamento di Aruba, e comisionnan di Igualdad di Genero, Mucha y Hubentud y tambe e comision di Medio Ambiente y Turismo a atende e reunion di Parlatino na Corsou. Den e comision di Igualdad di Genero, Mucha y Hubentud, di cual Parlamentario Hoek ta forma parti, a haya un presentacion extenso di e representante di Cuba cu a trece dilanti e ley modelo pa loke ta salud sexual di embaraso di adolescente.
“Den e punto aki, nos como Aruba por a presenta y notifica con bon na Aruba tin un programa di prevencion di embaraso hubenil y con nos institutonan ta traha hunto. Esaki sigur tabata un plus punt, un parti positivo caminda cu Aruba por a presenta e proyectonan cu nos ta haciendo y e resultadonan cu nos ta wak den e ultimo añanan aki”, Hoek a expresa.
A haya tambe un presentacion fo’i Ministerio di Asunto Social di Corsou unda e elabora riba e plannan pa hubentud cu tin. Un di e plannan ta e introduccion di e Codigo di Proteccion di Mucha y Hoben. E delegacion di Aruba a sinti hopi orguyoso pasobra ya caba na Aruba a implementa y tin e Codigo di Proteccion. Por a mustra e desaroyonan y e experiencia cu tin como tambe e partinan positivo cu ta wak den e programa aki.
Finalmente, Parlamentario Ricky Hoek a indica cu luna di april a bay enfoca riba conscientisacion contra abuso di mucha. “Hopi trabao gobierno di Aruba a bin ta haciendo desde 2017 te cu dia di awe. Ainda tin mas proyecto andando y cu lo sigui cana na bienestar y cuido di nos mucha- y hobennan pa pais Aruba.”
