Coach Nial Alexander ta informa cu tur cos ta cla y nan ta prepara pa competi na Corsou y tin hopi emocion den aire pa loke ta e wega di Baseball aki.
Tin 13 mucha representando Aruba, un bon team hinca den otro cla pa competi. Coach Alexander ta bisa cu lo tin tres dia di wega, tras di otro, pues e intencion ta pa bay hunga bala tur cu tin. “E intencion ta pa haya e experiencia, mas conocemento, y sigur expone Aruba su talento.”
Ta un combinacion di White Sharks, Brazil Hawks y Hurricanes tambe, dus ta un team hinca den otro cu pa prome biaha lo bay Corsou pa representa Aruba. “E ta un reto cu nos ta cla p’e.” E preparacion tabata un poco duro, segun e coach, pa hinca tur cos den otro, cooperacion di famia tabata bon, y tur cos a keda cla pa fin di siman cu a pasa.
Pa loke ta e fondonan y tur otro logistica, a logra tur esaki na tempo pa e muchanan por bay hunga bala na Corsou. “P’ami den e caso aki personalmente ta mas pa e exposicion, y pa por sinti con ta hunga bala na un otro nivel, den un otro ambiente, pa e muchanan cuminsa custumbra cu esaki pa futuro y brinda e oportunidad pa eleva nan nivel.”
Ta spera di por atende mas torneo den futuro cu e chens di yega Big League un dia.
E weganan ta bay ta den categoria di 7 pa 8 aña di edad. Tin un lista di hende pa gradici pa esaki, pero segun coach Alexander sigur un danki ta bay na tur familiar, amistad, organisacionnan cu a yuda, Ennia, Xander Bogaerts Foundation a yuda tambe, pero sigur e mayornan cu a asisti tremendamente pa e logro aki.
Ta desea tur mucha exito y pasa bon, disfruta, siña y sigui crece den e deporte.
