Ayo Rock Formation ta un patrimonio nacional cu tin un historia impresionante pa cual tin hopi pintura bunita di e indjannan, e barancanan grandi, e matanan unico, e bestianan y sigur un luga cu por relaha y disfruta. Diahuebs, 28 di september 2023, a completa e fase uno di renobacion di Ayo Rock Formation. Un aña y mey pasa a cuminsa cu e trabounan pa restaura e parke pa nos local- y turistanan por sigui bishita.
Renobacion Fase 1
Den e fase uno a renoba e caminda di cana, a pone railsnan di metal pa siguridad riba e ruta cu e personanan ta cana. Tambe a renoba e dak di e palapanan, a traha un brug di palo na e parti cu e rooi ta drenta den Ayo. A pinta e tralienan pa asina proteha e cueba cu e pinturanan di e Indjannan. Na e entrada parti pafo y na e entrada parti paden a traha dos bunita borchi, uno pa identifica Ayo y pa yama bon bini na tur bishitante y e otro pa duna mas informacion y direccion di e ruta pa cana.
Renobacion Fase 2
Dentro di poco lo cuminsa cu fase 2. Esaki lo ta encera QR code p’e personanan cu ta cana den e parke, por haya riba celular tur informacion di e luga. Ayo Rock Formation sigur ta un atraccion turistico hopi popular y como local nos tur tin bunita recuerdonan di nos infancia eynan. Sea cu a bini den grupo como scout, plan vacacional, cu scol of a comparti hunto den famia. Mi kier invita pueblo di Aruba pa tuma e oportunidad pa pasa mira con bunita Ayo Rock Formation ta.
Mi kier gradici y felicita e comision completo cu ta consisti di Departamento di gobierno, na e instancianan no gubernamental y semi gubernamental, e ministernan y nan ministerio. Aki nos por mira cu trahando hunto ta logra pa Aruba sigui bay dilanti.
