Dialuna dos trahador di Otis a ser gara cu man den masa cu alcohol cu nan a caba di purba horta for hotel RIU Palace. E compania ta duna servicio di Elevator na e hotel.
Pa algun tempo caba e Hotel a ripara cu tin cierto cantidad di alcohol ta wordo horta. A ripara y sospecha riba e trahadornan di Otis. Naturalmente ta sospecha tambe cu por tin hende den hotel cu tambe ta envolvi. Hasta a yega di haya alcohol scondi den e elevator cu no a logra bay cune. Algun dia pasa a perde caba como 30 boter di alcohol. Dialuna despues di sospecho anterior a vigila e trahadornan y durante e control a resulta cu nan tabata cla hortando atrobe hopi alcohol. Ta un total di 20 liter di alcohol y cerbez cu otro bebidanan. Tin di e alcohol aki manera rum cu tabata wordo basha den boter di awa pa disimula haci manera ta boter cu awa e tabata. Den emchinan tabata purba sali cu e alcohol scondi. Polis a ser avisa di e caso. Ora cu Polis a yega nan a topa cu e dos trahadornan y entre otro e alcohol cu demas bebida cu nan kier a horta. Polis a detene ambos y bay cu nan warda. A pidi gerencia di RIU pa entrega keho y asina por sigui cu e investigacion.
Ambos trahador di Otis a bay warda di Shaba. Parce cu gerencia di Otis tambe a ser avisa y nan a bay warda tambe pa mira kiko a sosode. Despues di varios sospecho a bin gara e trahadornan cu man den masa. Den e investigacion lo saca afo si nan mes tabata horta den mesun estilo e alcohol na RIU Antillas. Parce un di e sospechosonan tin un familiar trahando na RIU tambe. Mirando e cantidad di alcohol cu tabata ser horta ta mustra cu ta benta tin tambe di alcohol di RIU riba caya.
