Algun turista a huur un auto pa asina bay core rond riba nos isla. Loke nan ta considera One Happy Island a cambia totalmente ora cu nan a bira victima di ladronicia. Nan a para e auto den e area na costanan pariba cerca Colony. Poco pariba di KIA. Nan a laga e yabi den bista publico. Suficiente motibo pa e ladron mire y pasa man pa e auto.
E turistanan a yega na un restaurant na Lago Heights y asina bati alarma. Polis a bay cerca nan y asina scucha kiko a sosode. A manda un mensahe pa tur patruya pa asina tira bista riba e auto shinishi V-5966. Den oranan trempan di anochi a topa cu e auto riba un hanchi di santo banda di un gym na Santa Cruz. A confisca e auto. E auto tabata mustra intacto y esey sigur ta un alivio caba pa e turistanan cu lo no carga extra gasto.
