Trahadonan di SABA, Stichting di Cas di Cuido di Grandinan, a bay den accion mainta tempran demandando nan Bashi Premie. Den e ultimo simannan, a bin compronde cu nan lo no bini na remarca pa haya e prima aki, cual normalmente gobierno ta paga na inicio di aña.
“Paga nos Bashi Premie” ta loke ta para riba algun di e borchinan of pinta riba glas di autonan. Rodrigo Tromp, shopsteward di SEPPA, a splica cu nan tin problema cu e directiva cu no kier paga e Bashi Premie. Of ta bisa cu lo pague pero lo kita 7 ATV-Dagen cu e empleadonan tin pa aña normalmente, pa recompensa pagonan cu no a haya den pasado for di gobierno.
Tromp a cuestiona cu den forma unilateral, directiva di SABA a kita e pago aki cu ta poni den nan CAO. Esaki ta algo pa cual lo mester sinta na mesa y negocia riba dje.
Como cu nan ta cay bou subsidio di gobierno y ta haya tur e primanan aki, a sinta negocia y a yega na un acuerdo pa entrega total di 5% en bes di entrega e premienan. Sinembargo den e ultimo reunion cu ABV tabatin cu SABA, a bin dilanti cu nan kier pa entrega tur premie. Awo a bin acerca cu si kier e bashi premie lo mester entrega 6 pa 7 ATV-Dagen, y esaki ta algo cu e trahadonan no ta di acuerdo cu ne.
Nan proposicion na SABA ta entrega mita di e premienan, of 5% di nan salario y nada otro. “No ta mishi cu ATV-Dagen ni vakantie-uitkering”. Esaki ta djis un advertencia pasobra e siguiente biaha ta tur trahado ta bay den accion”.
Nan ta sinti cu SABA ta uza e sindicato ABV pa laba nan man y haci e trabou sushi pa nan. ABV mester a bin cu un reunion y no a spera cu mayoria di e hendenan cu a acudi ta di SEPPA y no a bay di acuerdo cu e proposicion pa entrega e premie-nan. ABV a dicidi di bay papia cu e director pa entrega 6 dia di ATV pa haya e premie, algo cu e trahadonan no ta di acuerdo. Awo ta bin tende cu ta paga e bashi-premie dia 31 pero kitando e dianan di ATV den 2021. “Nos no ta acepta esaki. E unico opcion ta mita premie of 5% di salario”, Tromp a enfatisa.
