E iniciativa di Colegio EPI pa promove habilidadnan di liderazgo entre su studiantenan a logra avancenan significativo, cu a culmina den un cooperacion fructifero.
Dialuna tabata Dia Internacional di Recursonan Humano y Zahaira Kelly, Docente/Stagecoordinator y Coordinado di e Leadership Program a indica cu nan tin como meta ekipa e studiantenan cu e herment- y recursonan necesario pa sobresali den nan carera.
Durante e workshop a enfoca riba diferente aspecto di capacitacion, e beneficionan cu e empresanan tin di ofrece y tambe a tuma luga un evaluacion di e studiantenan. A introduci e studiantenan na iferente training manager di e isla. Y diabierna a culmina c’un careerfair. Cada studiante por a bay cerca cada organisacion, hay nan informacion cu nan mester riba mercado laboral, sea nan ta graduando y ta buscando trabou, of nan ta bay stage.
E jobfair a sirbi como un plataforma pa e studiantenan explora posibel trayectonan profesional y relacion cu profesionalnan di e industria.
Reflexionando riba e importancia di e asociacion aki, Zahaira Kelly ta enfatisa e importancia di fomenta un relacion solido cu nan partnernan den nan e industria. A pesar di e retonan den e organisacion di evento, ya cu varios di e partnernan mes tabata tin nan mesun eventonan, pero asina mes e colaboracion tabata exitoso y sigur danki na varios di nan sponsornan manera Renaissance, Aruba Bank, Hilton Aruba y mucho mas.
E workshopnan organisa pa Coelgio EPI a atrae mas o menos 100 studiante a pasa na cada booth, pero den e programa di leadership nan tin 36 participante motiva y ansioso pa subi e mercado laboral, ansioso pa cuminsa cu nan proceso profesional.
E comentarionan di e studiantenan cu a asisti na e workshopnan aki tabata sumamente positivo, i hopi a expresa gratitud pa e oportunidad pa haya informacion valioso y hasi preguntanan relevante. Colegio EPI ta sigui fomenta e habilidadnan di liderazgo y brinda recurso invaluabel na su studiantenan, e ta mantene su compromiso pa capacita e siguiente generacion di profesionalnan pa nan por logra den e campo cu nan ta scoge.
