Na maart IOWUA a negosha cu CITGO, cu tabata un atraccion fatal pa Aruba. Segun Boy Anthony, presidente di sindicato IOWUA y Chief operator den T-dea (Terminal di Energia Aruba), CITGO a bin cu un bunita plan pa bin cu LNG, cu gas, tubo di gas for di Venezuela pa traha crudo sintetico. Nan no a haci nada na Aruba ni den e refineria ni e terminal. Nan no a inverti, esey a haci cu a bay hopi mas atras.
Nan tabata reconoci como multinacional cu 3 refineria, nan tin stacion di gasolin na Merca, pero nan no a cumpli cu e departamento di Labor, nan no a cumpli cu e trahadonan, ni cu contratista, ni cu ley di Aruba.
No mester un di dos CITGO awor aki, segun Anthony.
E aña en general
IOWUA a firma un contract cu gobierno pa un aña cu ta vence dia 28 di februari 2021. E deal tabata pa nan haya un operator pa maneha e terminal of e refineria.
Pero no a logra. Pa ley y pa e CAO vigente cu tabata tin cu CITGO, cu ta valido te cu fin di october 2021, e ora tin cu bay mesa cu gobierno pa por wak kico ta bay pasa cu nan.
Anthony a agrega cu CITGO a bay y a traha skeleton. Esey ta un ocupacion minimo. A core cu tur hende, pero na momento cu nan a bira T-Dea y a haya un director, kende ta Eddy Oduber. E persona aki tin hopi experiencia. El a busca e miho hendenan.
Den un refineria y terminal mester, vooral si kier drech’e, hendenan adecua, engineering cu a traha antes, mester planters, mester contratistanan cu sa y cu a traha antes. Tin e wafnan, etc. cu mester hende cu sa con pa drecha nan, con pa nan opera.
A haya hopi bon cu a busca tur e hendenan aki, esta inspector, ingeniero, planners, etc. y nan mesun hendenan cu tabata boga p’e, cu no a bay basa riba politica of colo di partido. El a bay a base di conocemento. Si kier logra cu un refineria of terminal, e mester bay a base di conocemento.
Anthony ta calcula cu nan ta por lo menos 55 trahado. Cu e recursonan cu tin cu ta hopi limita, pasobra no tin placa, toch a logra hopi. Manera ta conoci, diesel, jetfuel, gasolin y fuel oil ta cardinal pa e economia di Aruba, apesar di e COVID.
COVID a dal tur hende duro. Asina mes, Tdea a sigui deliver y percura pa comunidad pa asina no perhudica e economia. Esey tin cu bisa cu ta hopi bon. Tambe Anthony a agrega cu e personanan cu ta trahando awor aki ta multifacetico. No ta pasobra cu ta traha den oilspill por haci otro cos. Anthony tin hopi aprecio con cos a bay y con e hendenan ta trahando. Nan a tuma trahadonan di antes pa coordina waf, coordina field y nan ta haciendo un tramendo trabao.
Anthony no tin nada malo di papia. IOWUA mes ta wardando caba di negosha. Tin dos compania awor aki, cu ta Quanten y Eagle LNG. Manera Eagle LNG kier bin cu un planta di gas. Pero e planta di gas aki, Valero caba a bin cu ne. El a hasta inverti den ingenieria cu ta encera un planta chikito di gas cu ta hopi mas limpi cu fuel oil. Pa medio ambiente e ta hopi importante.
Ademas di esey, e ta un negoshi, pasobra si WEB ta asina leu pa cambia fuel oil pa gas, e ta hopi mas limpi y confiabel. Ta mescos cu bo ta sende un stof y e proceso ta mas stabil. Por bend’e den Caribe. Si e refineria bira un realidad, por mand’e p’e.
