Un hoben Rubiano a perde su bida den hospital na Republica Dominicana. Autoridad di e pais ta culpabel di loke a pasa cu Jarick Steven Patrick Farro. Ta teme cu pa negligencia medico e hoben a fayece di forma inespera.
E tabata keha algun tempo caba cu e tin problema cu djente. Un kies tabata molestie. El a avisa nan di su situacion unda e tabata. Asina mes a nenga di yud’e mesora. Ora cu e situacion a empeora a core hib’e hospital. E tabata interna.
![](https://24ora.com/wp-content/uploads/2024/05/WhatsApp-Image-2024-05-25-at-10.19.01_665e10a1.jpg)
Jarick Farro tin apenas 31 aña di edad. Diabierna merdia ainda el a papia cu su tata na telefon, siendo interna den hospital. Pa 7:00 pm nan a haya e noticia tristo cu Jarick a fayece.
Embahada di Reino Hulandes na Republica Dominicana mesora a cay aden y nan a tuma contacto cu e famia na Aruba. E tabata un sla duro pa e tata Patrick Farro y mama Jacky Feliciano na Aruba.
Awo ta bay cuminsa e proceso pa trece e curpa di Jarick Farro bek pa Aruba pa famia por prepara su entiero. E chens ta grandi cu por spera un demanda contra autoridad y husticia di Republica Dominicana pa e negligencia.
Famia tabata den e proceso, hunto cu autoridad, pa asina Jarick por a bin Aruba pronto na bida. Sinembargo, cos a bay robes y awe pa negligencia, Jarick Farro a fayece.
Hopi forsa na henter famia cu perdida di nan ser keri.