Diabierna a cuminsa cu un walkout na DIP, entrega carta protesta di doñonan di kiosco di Welcome Plaza na Parlamento y gobierno y despues walkout, un biaha mas, na Ambiente Feliz.
Edmundo Marlin, Secretario di Organisacion di sindicato SEPPA tabata presente y a splica cu e malcontento aki ta debi na e pago di Bashi Premie cu mester a pasa for di dia 10 di januari ultimo y te ainda e trahadonan no a mira esaki riba nan cuenta.
Nan ta atendiendo cu gobierno e asunto aki, pero ta mira cu tempo ta pasa y no ta tende mas. Por bisa cu nan pasenshi a caba. Door di protesta un biaha mas ta demostra nan malcontento y indigna. Parce cu no a pasa e placa completo pa fundacion.
Inclusive, SEPPA a papia cu e minister, kende a bisa cu e ta trahando riba e asunto, pero nada ainda. For di inicio di januari ta riba e tema, ora cu ah aya sa cu gobierno no a paga e placa completo.
Otro fundacionnan a paga e Bashi Premie caba, pero Ambiente Feliz no por a cumpli, pasobra loke nan a haya tabata solamente pa paga salario. Ta pidi gobierno cumpli pa caba.
SEPPA tambe ta atendiendo cu trahadonan di Stichting Piscina Olimpico, pero otro fundacionnan tabata suficiente fuerte pa saca e placa di un post y haci e pago necesrio.
Ambiente Feliz ta un fundacion vital pasobra e 18 trahadonan ta atende cu e hendenan special. Awo nan ta pendiente, si no tende nada, otro siman lo tin accion un biaha mas.