Operadornan di kiosco di Welcome Plaza ta den un situacion hopi penoso. Basa riba e hecho cu no ta haya contesta riba cartanan cu nan a manda for di 2018 pa awo. Nan preocupacion mas grandi awo ta e pago di huur cu nan no por cumpli cu ne. P’esey awe a dicidi cu un grupo ta bay entrega un carta na presidente di parlamento y despues a bay na sede di gobierno pa entrega prome minister Wever Croes un dossier, cu ta contene tur e cartanan y nan preocupacionnan.
E prome carta a entrega a president di parlamento Juan (Ady) Thijsen cu e peticion pa haya un reunion cu e comision encarga unda nan por expresa nan preocupacionnan.
Lidia Maldonado a haci entrega di e carta cu un copia pa cada lider di fraccion. Presidente Ady Thijsen di su banda a bisa cu e ta bay evalua ki tipo di reunion nan lo bay yama. Y hasta a menciona cu e por ta uno manera cu a sosode cu e piscadonan cu tabata preocupa cu spearfishing, cu finalmente a haya un solucion.
E grupo a splica cu nan ta den un situacion financiero hopi malo. A trata di atende e problema aki cu DIP pero no ta haya atencion. Turismo crucero ta paralisa for di momento cu e pandemia di coronavirus a cuminsa aña pasa. Practicamente nan no tin entrada. E kiosconan ta situa riba Welcome Plaza, pues no ta cuestion cu nan por move bay traha otro caminda.
Sra. Maldonado a splica cu mayoria di esnan cu ta huur un kiosco ta biba di esaki y no tin otro entrada. Algun a haya FASE pa dos luna y despues nada mas.
Den e diferente cartanan cu a manda pa DIP ta pidi pa exoneracion di e pago di huur te ora cu turismo crucero activa atrobe. Pero tambe tin problema cu nan a bin ta señala for di 2018. Mas tristo, segun un di nan voceronan Elizabeth Guanipa, ta cu no ta haya ni contesta riba tur nan cartanan. No ta solamente carta, a manda email, a haci esaki individualmente y como asociacion, pero te ainda no tin un solucion.
Na Bestuurskantoor e grupo di mayoria di huurdonan di e kiosconan di Welcome Plaza mester a warda pasobra no tabatin un minister disponibel pa ricibi nan. Riba diabierna normalmente tin reunion di Conseho di Minister.
