Desde diabierna tur hende a cobra y bay goza carnaval, mientras cu e trahadonan di Ambiente Feliz, nan salario no a pasa, segun Irma Dirksz, groepleidster y representando e trahadonan di e instancia.
E ta sigui splica cu desde un tempo caba esaki ta andando. Tur aña bashi premie no ta pasa na tempo, salario no ta pasa na tempo tampoco na januari y ainda den luna di februari, ainda nan placa no a pasa.
E inkietud ta cu tur hende a cobra, mientras tanto cu Ambiente Feliz tambe kier gosa. E clientenan tambe tin cu haya nan placa di cuminda. Nan mester di nan placa. Nan a traha p’e. Mayoria di e trahadonan tin yiu pa cria.
Dirksz ta comenta cu aworaki nan ta wardando, pasobra nan tin entendi for di nan directiva cu e fayo tabata sinta na Directie Financien. Tin di compronde cu mainta e directiva a manda un email pa e director di Financien riba esaki. Esaki na su turno a pidi disculpa. Pero esaki no ta cubri e gasto di e trahadonan.
Dia di cobra ta dia 24 di luna, segun Dirksz, pero 24 a cay riba un dia di fiesta y normalmente mester a cobra dia 21, cual tabata diabierna.
Ambiente Feliz tin 18 empleado den funcion cu ta wordo paga pa Gobierno. No ta hopi hende, pero asina mes, nan ta keda hende.
Loke nan kier ta nan placa, nan kier pa nan deposita nan placa pa awe ainda, cu nan por cobra. Di e mesun salario, e placa di e clientenan mester drenta pa por cumpra cuminda.
