Awe a presenta resultadonan di e “doorlichting” haci na AZV na Minister di Turismo, Salubridad Publico y Deporte, Dangui Oduber. Pa prome biaha den historia Gobierno y AZV laga haci un investigacion profundo riba e gastonan di AZV y tambe pa duna un proyeccion pa futuro y kico ta e risico cu esaki ta bin cune. E investigacion no a duna un resultado negativo, pues no por papia di mal maneho sino mas bien di gastonan subiendo mescos cu tur otro parti di mundo!
Director di AZV, Ruben Goedhoop, a presenta resultadonan di e investigacion aki na Minister Dangui Oduber. Tabatin varios punto cu sigur a hala atencion. Por a nota cu gastonan di cuido medico a subi di 357,3 miyon florin na 2014 pa 425,7 miyon na 2018. Si nos compara y “benchmark” e aumento aki cu otro paisnan rond di mundo, por bisa cu esaki no ta un aumento excesivo compara cu otro paisnan. E gastonan medico di otro paisnan a aumenta na e mesun forma.
Na aña 2016, cada ciudadano sigura via AZV a costa US$. 3576 pa persona. Gastonan den cuido medico cu ta relativamente halto ta entre otro Diabetes, Nierdialyse y otro malesanan cronico. Vision di Minister ta pa promove un miho cuido medico y un miho calidad di bida pa e poblacion di Aruba. Pa e motibo aki a bin cu un plan nacional di prevencion riba malesanan no contagiabel.
Otro forma di tuma medida pa reduci gasto ta pa AZV, Hospital y ImSan traha hunto pa hisa calidad di cuido mientras ta baha e gastonan. Un ehempel ta si por utilisa un localidad so pa Dialyse y otro facilidad pa un otro servicio medico, asina balansando e trabou y gastonan enbes di competi cu otro.
Digitalisacion y innovacion den cuido tambe ta e futuro pa cuido medico. Ideal ta si por haci triage via un app of facetime cu bo Dokter di cas y a base di esey e lo por conseha Bo si ta necesario pa acudi personalmente cerca dje of continua cu “Self Care” na cas.
Un otro punto remarcabel ta cu 4% di e aseguradonan di AZV ta contribui na 40% di gastonan di AZV. E edad promedio di e aseguradonan di AZV na aña 2014 tabata 38.7 y ta proyecta cu esaki lo bira 40.5 den 2020 y cu proyeccion pa aumento continuo den futuro. Esaki gran parti tin di haber cu e “vergrijzing” cu Aruba ta aden actualmente cu tambe lo conoce un aumento continuo.
A base di e resultadonan di e investigacion haci na AZV, lo haci un “plan van aanpak” pa garantisa sostenibilidad di e fondonan di AZV pa futuro.
