Awe e weganan di Bolas Criollas a start sali relaciona cu celebracion di nos Himno y Bandera na e canchanan di Papaya Ranch.
Un total di 64 team lo ta batayando awe y mayan pa obtene e titulo di campeon damas y cabayeros.
E aña aki e torneo di Bolas Criollas organisa pa Papaya Ranch a keda specialmente dedica na honor di Sr Pedro Goncalves, mihor conosi como Don Perucho un pionero pa e deporte di Bolas Criollas na Aruba.
Pa Don Perucho, Bolas Crioyas semper tabata mas cu un wega p’e; bolas tabata su pasion cu a yena hopi aña di su bida cu recuerdonan memorabel y ainda na e bunita edad di 88 aña Perucho ta sigui practica e deporte aki. Bolas criollas ta core den su sanger.
For añanan añanan 80, Don Perucho a cuminsa practica e deporte di bolas criollas na Aruba. Promer Don Perucho a hunga dilanti su cas, riba santo y sin veld, inspira pa e prome set di bolas criollas cu ela haya obseqiuo di su famia di Venezuela, Don Juan Texeira, kende a trese e set aki for di Venezuela p’e.
Hopi biaha, specialmente ariba diadomingo, Perucho y su famia tawata hunga bolas y a comparti momentonan di alegria y union familiar.
Banda di su cas na Alto Vists tabata tin un pida tereno bashi, y aki ta na unda Perucho y un compadre a dicidí pa crea canchanan di bolas criollas, y asina e team Los Compadres di Aruba a nace.
E nomber Los Compadres no solamente ta honra famianan di Perucho na Venezuela, cu ta hunga bou di e nomber Los Compadres di Venezuela, pero tambe ta simbolisa e compañerismo entre tur e hungadornan cu ta su famia y amistadnan.
Durante e añanan Los Compadres a crea 5 veld di bolas criollas ariba nan tereno na Alto Vista, caminda a organisa diferente torneo di bolas criollas.
Los Compadres a bira un nomber conosi no solamente na Aruba, pero tambe na Corsou y na Venezuela.
Don Perucho y Los Compadres no solamente a gana diferente trofeo, pero durante torneo el a demostra su mes como e mihor ‘arimador’.
Su momento mas memorabel tabata ora ela lansa e prome bola asina serca di e mingo, cu e otro team a hunga tur 8 bola sin exito.
Perucho su dedicacion na Bolas Crioyas a trece bunita recuerdonan y un herencia cu lo sigui biba di generacion pa generacion den su famia.
E ta un honor grandi pa Don Perucho cu ela wordo reconosi dor di Papaya Ranch ariba 17 di maart 2024. Don Perucho ta invita full Aruba pa pasa keiro na Papaya Ranch y disfruta di weganan di Bolas Criollas y unda tambe tin un bon surtido den bar y cushina. Don Perucho ta padrino di nos colega Nelson ‘Speed” Andrade.
