“John F. Kennedy a yega di bisa no puntra kico bo pais por haci pa bo sino kico abo por haci pa bo pais. Nos politiconan durante campaña ta primiti di sirbi nos Aruba dushi tera sin ningun interes personal, pero ora nan drenta gobierno nan ta lubida y exigi pa pueblo mester sirbi nan. Ta custumber pa wak e splinter den wowo di otro, pero no ta mira e balki den nan propio wowo.” Esaki ta palabranan di Eric Ras di partido CURPA.
“Dia 8 di februari 2023 nos isla a ricibi bishita di un crucero di LGBT+. Nos por corda cu nos centro di ciudad a converti den un campo alegre. Tabata tin actonan sexual cu a tuma luga publicamente na cierto restaurantnan den Oranjestad. Si ta un cos cu nos leynan no ta permiti ta actonan sexual den nos nightclubnan ni restaurantnan. Esey ta suficiente motibo cu un restaurant y nightclub lo perde su permiso. Gobierno e tempo ey a ricibi criticanan pisa pero parce cu nos gobierno den un forma scondi kier duna nos isla un regalo special pa celebra nos Himno y Bandera y tambe prepara nos isla pa e ley cu mester bin parlamento pa asina haci matrimonio di mesun sexo legal.
Partido Curpa for di un principio a lanta para pa e famia institui pa Dios esta matrimonio entre homber y muhe punto. Partido AVP ta den un caida formal. Despues di tabata tin ideologia Cristian Democrata a cambia esaki pa un ideologia liberal socialista cu e meta pa tre e cambionan den nos comunidad cu no lo faborece nos pueblo. Un partido AVP cu tabata tin 13 asiento na 2013 awe tin 5 asiento paso 2 asiento a bula bay. Un partido cu a bay contra di principionan di Dios y establece leynan cu ta bay contra leynan di Dios tin consecuencia y awe partido AVP ta biba e consecuencia. Tur e partidonan politico cu a vota pa legalisa e geregistreerd partnerschap a recoge nan cosecha. Dia 1 di maart 2021 un total di 17 parlamentario a vota na fabor pa e geregistreerd partnerschap bira legal dia 1 di september 2021.
Partido MEP a mata partido Red Democratico y partido POR. Mañan partido Raiz ta na turno paso nan ta para banda e minoria cu ta vocifera matrimonio di mesun sexo. Pueblo no lubida dia cu a entrega e 16 mil firmanan cu vice prome minister Ursell Arends a ricibi paso nos prome minister tabata na Hulanda. Minister Arends a hiba un discurso riba Aruba National Gender Policy cu el a laga traha na mei 2022 y a presente tambe aki na Aruba na october 2022. Partido MEP y RAIZ cu nos parlamento ta na fabor pa e ley bira legal. Si ley aki bin parlamento lo e wordo aproba. Tabata tin motibo suficiente e tempo ey pa nos parlamentarionan supuestamente Cristian kita nan sosten for di gobierno pero ta prefera di keda cobra paso nan sa di no lo regresa den Parlamento e siguiente eleccion. Ora e crucero bandona Aruba e por hiba nos parlamentarionan y nos ministernan tambe.
E actonan aki ta haci cu Dios su vengansa lo baha ariba Aruba. Dios lo bay pone Aruba dushi tera riba rudia pa e hendenan aki compronde cu tin un Dios. Pueblo di Aruba hisa bo bandera y pone half stengel pa asina nos gobernantenan mira cu nos pueblo ta di luto. Dios ta pidi obediencia y no sacrificio. Si nos actonan ta conforme boluntad di Dios nos lo wordo bendiciona. Partido MEP y partido RAIZ ta na caminda pa un derota aplastante den e proximo eleccion. Dios lo no tolera nan actonan cu ta bay contra principio nan di Dios. Tin expresion ta bisa pa no drenta misa pa e dak no cay riba bo. E tempo di Dios ta perfecto.
